Há­tíð­leg kransa­kaka fyrir fermingar­daginn

„Það er mælt með því að baka kransakökuna tímanlega og frysta hana. Hún verður betri þannig. Ég tek hana svo út úr frystinum kvöldinu áður en ég ætla að skreyta hana eða að morgni,“ skrifaði Helga Magga og deildi uppskriftinni og aðferð með fylgjendum sínum á Instagram.

Hátíðleg kransakaka

Hráefni

Fjórtán til sextán hringir:

1 kg kransakökumassi 

500 g sykur

2 eggjahvítur

Átján hringir: 

1,5 kg kransakökumassi

750 g sykur

3 eggjahvítur

Glassúr

Ein eggjahvíta

Flórsykur (misjafnt hversu mikið)

Sítrónusafi nokkrir dropar

Aðferð

Stillið ofninn á 190°C undir og yfir hita.

Byrjið á að hræra massanum og sykrinum aðeins saman í hrærivél eða matvinnsluvél. Bætið eggjahvítunum út í og hrærið áfram. Massinn á að vera þéttur og ekki of blautur. (Ef eggin eru stór gæti verið gott að nota aðeins minna af eggjahvítunum.)

Setjið massann í kæli yfir nótt eða nokkrar klukkustundir áður en hann er bakaður.

Þá er að hefjast handa og búa til hringina.

Skerið part af massanum og rúllið í lengjur. Gott að nota reglustiku eða málband til að mæla þykktina. Hver lengja á að vera 1,5 cm á breidd. 

Taktu reglustikuna og mældu fyrsta hringinn 10 cm langan. Eftir það eru þremur cm bætt við næta hring.(13 cm lengja, 16 cm lengja, 19 cm lengja og svo framvegis.)

Myndaðu hring úr lengjunum. Notið smá vatn til að loka sárin.

Setjið hringina á plötu. Gott að raða þeim vel með smá bil á milli hringja. 

Áður en þeir eru bakaðir er sniðugt að dúmpa aðeins ofan á þá með hnífsblaði til að slétta misfellur.

Bakað í 11-13 mínútur. Fylgist vel með þeim svo þeir verða ekki of dökkir. Við viljum að hringirnir séu ljósbrúnir. 

Kakan er sett í frysti og tekin út kvöldinu áður. Skreytið kökuna sama morgun og hún er borin fram. 

Skreyting

Glassúr

Þeytið saman einni eggjahvítu, flórsykri og nokkrum dropum af sítrónusafa. Sigtið safann út í. 

Bætið flórsykri í skálina þar til blandan fer að þykkna og orðin teygjanleg.

Ef glassúrinn er of þykkur má bæta meiri sítrónusafa út í.

Byrjið á að sprauta á neðsta hringinn. Gott að setja örlítið af glassúrnum undir til að festa hann við diskinn. 

Skreytið einn hring í einu og setjið næsta hring ofan á til að þeir festast saman.

Í lokin má bæta við blómum eða öðru skrauti.

Aðferðina má sjá í myndskeiðinu hér að neðan.

„Það er skemmtilegt að baka kransaköku sjálfur, ódýrt, en vissulega tekur það smá tíma. Skemmtilegt að baka saman með fermingarbarni og leyfa því að velja skrautið sem fer á kökuna. Ég elska að skreyta kökur með lifandi blómum, alltaf gott þegar notuð eru lifandi blóm að setja þau á kökuna stuttu fyrir veisluna, amk. ekki kvöldinu áður,“ skrifar Helga Magga við færsluna.