Hættir eftir sau­tján ára starf

Frá þessu greinir í tilkynningu þar sem fram kemur að Kristinn hafi hafið störf árið 2007 sem fjármálastjóri samstæðu Samskipa. Hann hafi í upphafi leitt umfangsmiklar umbreytingar á félaginu, meðal annars að færa höfuðstöðvar félagsins til Rotterdam í Hollandi. Í kjölfarið hafi fjárhagsskipan félagsins verið endurskipulögð og fjármálasviði samstæðunnar breytt til þess að styðja við vöxt og framtíðaráform Samskipa.

Haft er eftir Kristni að tími hans hjá Samskipum hafi verið einstaklega gefandi. Hann sé fullur þakklætis fyrir tækifærin og reynsluna sem þessi sautján ár hafi fært sér. „Ég mun sakna allra þeirra góðu vina og kollega sem ég hef eignast og fengið að starfa með á þessum tíma. Samskip munu ávallt vera ofarlega í huga mínum og ég hlakka til að fylgjast með félaginu á komandi misserum, sér í lagi næstu umbreytingu Samskipa er snýr að umhverfis- og sjálfbærnismálum, en þar eru Samskip framarlega á sínu sviði. Ég óska Samskipum, vinum og kollegum alls hins besta,“ segir Kristinn. 

Þá er haft eftir Kari-Pekka Laaksonen, forstjóra Samskip Group, að það verði mikill missir af Kristni sem hafi verið mikilvægur hlekkur í uppbyggingu og umbreytingum á rekstri félagsins undanfarin sautján ár. „Við þökkum Kristni góð störf fyrir Samskip og óskum honum velfarnaðar og alls hins besta í framtíðinni.“

Fram kemur að frá 2007 hafi velta Samskipa samstæðunnar nær tvöfaldast í evrum talið og sé í dag um 800 milljónir evra. 

„Rúmlega 75% af heildarumfangi (veltu) Samskipa samstæðunnar er utan Íslands. Samskip eru með eigin dótturfélög í yfir 20 löndum og tæplega 80 fyrirtæki eru hluti af samstæðuuppgjöri Samskipa.

Á þessum tíma hefur Kristinn komið að kaupum og á fjölda fyrirtækja, sem nú eru hluti af samstæðu Samskipa, svo sem Nor Lines, ECL, SeaConnect, og fleirum, sem og fjölda skipakaupa og fjármögnun þeirra,“ segir í tilkynningunni. 

Samskip hf. eru alþjóðlegt flutningafyrirtæki sem starfrækir 46 skrifstofur í 24 löndum í fimm heimsálfum. Starfsmenn fyrirtækisins eru um 1.500 talsins.