Eftir­minni­leg Skotlandsferð FC Sækó: Spiluðu við Celtic og heim­sóttu Hampden Park

Upphaf Sækó má rekja til 2011 en þá var það samstarfsverkefni Hlutverkaseturs, Velferðarsviðs Reykjavíkur og geðsviðs Landspítalans. Félagið var svo stofnað þremur árum síðar og er það skipað notendum geð- og velferðarkerfisins, starfsmönnum þess og öðrum sem hafa áhuga á að styðja við verkefnið. 

Sækó gefur fólki með geðraskanir tækifæri til að stunda fótbolta sem auk þess sem markmið liðsins er að draga úr fordómum. Sækó hefur alla tíð notið liðsinnis KSÍ og unnið til grasrótaverðlauna UEFA.

Í síðustu viku fór Sækó til Skotlands þar sem liðið mætti liðum á vegum Celtic og Falkirk. Að sögn aðstoðarþjálfara Sækó, Antons Magnússonar, heppnaðist ferðin vel.

„Við fórum út á þriðjudaginn fyrir viku. Menn fengu fjóra klukkutíma til að hvíla áður en við fórum til Falkirk að spila,“ sagði Anton í samtali við Vísi.

Íslandsvinurinn Marc Boal átti veg og vanda að skipulagningu ferðarinnar, í gegnum verkefni sitt Lava Cup. Hann hélt það á Íslandi í fyrra og í kjölfarið kom til tals að Sækó myndi fara til Skotlands.

„Hann er forsprakki þess að þetta allt átti sér stað og var okkur innan handar í einu og öllu,“ sagði Anton.

Á þriðjudaginn mætti Sækó annars vegar Falkirk og hins vegar liði sem nefndist Destiny United.

„Við vorum með þokkalega breiðan hóp og honum var skipt í tvennt. Við spiluðum við Falkrik og Destiny, sjö á móti sjö. Hugmyndafræðin á bak við Destiny er svipuð og þeirri sem liggur Sækó til grundvallar,“ sagði Anton.

„Þetta gekk ansi brösuglega fyrstu leikina enda flugþreytan algjörlega búin að keyra menn í kaf. En það breytti ekki miklu þegar kom að okkar mönnum. Þeir voru bara glaðir og ánægðir að fá svona ferð. Herramennirnir í Falkirk voru svo ansi góðir við okkur og gáfu okkur treyjur og svona.“

Daginn eftir leikina í Falkirk fór Sækó aftur til borgarinnar til að heimsækja stofnun sem heitir Falkirk Mental Health Association.

„Það eru sjálfboðaliðar sem reka mjög öflugt starf fyrir fólk í Falkirk sem glímir við geðræn vandamál og maður að nafni Ian Dickinson, sem er forstöðumaður þar, var með góðan fyrirlestur. Þessi ferð var ekki bara hugsuð sem keppnisferð heldur einnig sem menningar- og fræðsluferð,“ sagði Anton.

„Svo bárum við saman bækur okkar, hvernig geðheilbrigðismál eru í Falkirk og Skotlandi og heima. Þeim þótti mjög fróðlegt að vita hvernig við Íslendingar tökum á þeim málum og það var yndislegt að sjá hversu mikinn þátt Sækó-liðar voru tilbúnir að taka þátt í þeirri umræðu.“

Á fimmtudaginn fyrir viku fór Sækó til Glasgow. Liðið heimsótti Hampden Park, þjóðarleikvang Skota, og mætti svo Celtic á Stepford Sports Centre vellinum í Glasgow. Leikirnir þar fóru betur en leikirnir á þriðjudaginn en úrslitin voru auka atriði.

„Aðalmálið var að búa til góðar stundir fyrir okkar félagsmenn, gefa þeim tækifæri á að mynda tengsl og njóta lífsins. Þetta eru strákar sem hafa þurft að glíma við ýmislegt í gegnum ævina, áföll og annað sem maður vill ekki óska neinum,“ sagði Anton.

„Þetta gekk ljómandi vel og við gætum ekki hafa óskað okkur betri útkomu fyrir félagið.“