Telja SKE hafa farið of­fari og hætta við kaupin

Þetta kemur fram í tilkynningu Síldarvinnslunnar til Kauphallarinnar, en upphaflega var tilkynnt var um kaupin 26. september á síðasta ári með hefðbundnum fyrirvara um samþykki Samkeppniseftirlitsins.

Fram kemur að að mati stjórnar Síldarvinnslunnar hafi Samkeppniseftirlitið „farið offari við skoðun málsins“ og hafi gagnabeiðnir ekki verið í neinu samræmi við umgjörð viðskiptanna, sérstaklega í því ljósi að eingöngu sé um að ræða sölu afurða á erlendum mörkuðum. Því líti út fyrir að gagnaöflunin séu farin að snúast um annað og meira en umrædd viðskipti.

„Síldarvinnslan hf. hefur afhent Samkeppniseftirlitinu öll gögn sem óskað hefur verið eftir og eru á forræði félagsins. Mikill vilji var til að klára þessi viðskipti enda aðdragandinn langur og ávinningur fyrir íslenskan sjávarútveg augljós.

Ákvörðun stjórnar Síldarvinnslunnar hf. er tekin með hagsmuni félagsins í huga. Er það ekki síst vegna viðamikilla verkefna í kringum starfsemi Vísis ehf. í Grindavík en í liðinni viku hófst enn á ný eldgos í námunda við bæjarfélagið.

Er það mat stjórnar Síldarvinnslunnar hf. að farsælast sé um þessar mundir að beina athygli og orku stjórnenda að brýnni verkefnum í bolfiskhluta starfseminnar. Þegar félagið sér fyrir endann á þeim verður unnt að taka fyrirkomulag sölu- og markaðsmála aftur til skoðunar.

Það er einnig mat stjórnenda Síldarvinnslunnar hf. að íslensk sjávarútvegsfyrirtæki þurfi að styrkja stöðu sína til að viðhalda samkeppnishæfni íslensks sjávarútvegs í alþjóðlegu viðskiptaumhverfi, þar sem hlutdeild Íslands er agnarsmá. Þessi munur hefur farið vaxandi undanfarið þar sem erlend sjávarútvegsfyrirtæki, sem eru í samkeppni við íslensku fyrirtækin á erlendum mörkuðum um sölu sjávarafurða, stækka stöðugt og auka umsvif sín. Sama gildir um einstaka kaupendur.

Nauðsynlegt er fyrir íslenskan sjávarútveg í heild sinni að mæta þessum áskorunum erlendis með því að styrkja alþjóðleg sölufyrirtæki, sem geta keppt við þessa risa á grundvelli afhendingaröryggis, verðs og gæða,“ segir í tilkynningunni.

42,9 milljónir evra

Á sínum tíma kom fram verðmæti Ice Fresh Seafood í viðskiptunum væri metið 42,9 milljónir evra sem jafngilti 1,76 sinnum bókfært virði eigin fjár þess hinn 31. desember 2022. „Viðskiptin felast annars vegar í kaupum á núverandi hlutum af Samherja hf. fyrir 10,7 milljónir evra, og hins vegar útgáfu nýs hlutafjár í Ice Fresh Seafood að fjárhæð 21,5 milljónir evra. Heildarvirði Ice Fresh Seafood verður 64,4 milljónir evra eftir hlutafjáraukninguna og fjárfesting Síldarvinnslunar nemur 32,2 milljónum evra.

Samhliða þessum viðskiptum mun Ice Fresh Seafood ganga frá kaupum á eignarhlutum í erlendum sölufélögum sem fyrirtækið hefur átt í farsælu viðskiptasambandi við undanfarin ár,“ sagði í tilkynningunni um kaupin í september síðastliðinn.