Fjórir látnir eftir mikil flóð í suður­hluta Þýska­lands

Nokkurra er saknað og þúsundir hafa neyðst til að flýja heimili sín eftir úrhelli um helgina. Lögregluyfirvöld í Baden-Württemberg sögðu í gær að maður og kona hefðu fundist látinn í kjallara húss í Shorndorf. Þá fannst 43 ára gömul kona látinn í Schrobenhausen.

Sá fjórði sem lést var slökkviliðsmaður, sem varð fyrir slysi þegar hann freistaði þess að koma öðrum til bjargar.

Neyðarástandi var lýst yfir í Regensburg og herinn kallaður til. 

Scholz sagði flóð á borð við þau sem Þjóðverkjar glímdu nú við væru ekki lengur „einstakir viðburðir“ heldur væru þau vísbending um stærra vandamál og viðvörun sem menn þyrftu að meðtaka.

Markus Söeder, ríkisstjóri Bæjaralands, sagði að það væri ómögulegt að tryggja sig að fullu gegn loftslagsbreytingum. „Það eru atburðir að eiga sér stað hér sem hafa aldrei átt sér stað áður,“ sagði hann.

Áhyggjur eru nú uppi vegna samgönguinnviða í tengslum við Evrópukeppnina í knattspyrnu, sem hefst 14. júní næstkomandi. Engir leikir verða spilaðir á flóðasvæðunum en áhrif flóða á samgöngur gætu torveldað ferðalög áhorfenda.

Guardian greindi frá.