Reitir hrista upp í skipuritinu

Í tilkynningu frá Reitum segir að í kjölfar stefnumótunarvinnu og nýrrar stefnu um kraftmikinn vöxt á næstu árum hafi fasteignafélagið innleitt nýtt skipurit. 

„Nýju skipuriti er ætlað að efla vöxt félagsins með skýrri verkaskiptingu og skilvirkum ákvörðunartökuferlum. Samfara nýju skipuriti verða breytingar í framkvæmdastjórn og fækkar þar um eina stöðu.“

Viðskiptaþróunarsvið hefur verið sameinað þróunarsviði. Verkefni þróunarsviðs eru m.a. arðsemisgreining fasteignaþróunar- og nýsköpunartækifæra ásamt þróun og verkefnastýringu þeirra fram að framkvæmdarstigi. 

„Stefnumörkun á sviði sjálfbærni, innleiðing sjálfbærnimarkmiða og utanumhald sjálfbærnimælikvarða tilheyrir jafnframt sviðinu þó sú vinna sé unnin þvert á fyrirtækið.“

Birgir Þór Birgisson hefur verið ráðinn framkvæmdastjóri þessa sameinaða sviðs. Birgir hefur umfangsmikla reynslu í þróun og verklegum framkvæmdum. Hann hefur starfað sem yfirverkefnastjóri hjá HS Orku frá 2020 en starfaði áður m.a. hjá Jarðborunum og Mannviti. Birgir er með M.Sc. próf í iðnaðarverkfræði frá KTH Royal Institute of Technology í Svíþjóð. Birgir mun hefja störf um miðjan ágúst.

Friðjón Sigurðarson, fráfarandi framkvæmdastjóri þróunarsviðs Reita, hefur óskað eftir lausn frá störfum. Friðjón hefur starfað hjá Reitum síðan 2013, og stýrt mörgum af stærstu þróunarverkefnum félagsins og lagt grunn að þeirri miklu uppbyggingu þróunareigna sem framundan er. Friðjóni eru færðar bestu þakkir fyrir gott samstarf og framlag hans til uppbyggingar Reita.

Ingveldur Ásta Björnsdóttir, sem starfað hefur hjá Reitum sem framkvæmdastjóri viðskiptaþróunar, tekur við framkvæmdastjórn nýs sviðs, Viðskiptavina. Markmið sviðsins er að bæta upplifun viðskiptavina með því veita viðskiptavinum greiðari aðgang að samfelldri þjónustu. Undir sviði viðskiptavina heyrir umsjón með útleigu og ný þjónustueining sem ætlað er að og breikka þjónustu við núverandi og nýja viðskipavini í takt við þarfir þeirra hverju sinni.

Kristófer Þór Pálsson er nýr framkvæmdarstjóri nýs sviðs, Fjárfestingar og Greiningar. Markmið sviðsins er að tryggja áframhaldandi fjárfestingu í arðbærum eignum, sem er einn af hornsteinum vaxtastefnu félagsins. Sviðið mun einnig afla gagna og framkvæma ýmsar greiningar til að undirbyggja ákvarðanatöku þvert á félagið og til að meta árangur stefnumótandi aðgerða. Kristófer hefur verið framkvæmdarstjóri viðskiptasviðs hjá Reitum síðan 2016.

Ragnheiður Margrét Ólafsdóttir, framkvæmdastjóri lögfræðisviðs og regluvörður félagsins, hefur óskað eftir lausn frá störfum. Ragnheiður hóf störf fyrir félagið í aðdraganda skráningar þess í kauphöll og hefur hún verið lykilstarfsmaður í vaxtarferli Reita undanfarinn áratug. Ragnheiði er þökkuð afar góð störf í þágu félagsins og ánægjulegt samstarf í gegnum árin.

Sigurlaug Helga Pétursdóttir, lögmaður, sem starfað hefur hjá Reitum síðan 2015, tekur við stöðu yfirlögfræðings og forstöðumanns lögfræðisviðs ásamt því að gegna hlutverki regluvarðar félagsins. Skipun hennar í hlutverk regluvarðar hefur verið tilkynnt til Fjármálaeftirlitsins og tók gildi frá og með 2.júlí 2024. Breytingar á skipuriti Reita hafa þegar tekið gildi.

Reitir er leiðandi fyrirtæki í fasteignaþróun ásamt rekstri og eignarhaldi atvinnuhúsnæðis. Innan eignasafns Reita eru um 460 þúsund fermetrar atvinnuhúsnæðis í rekstri auk 700 íbúða og 140 þúsund fermetra atvinnuhúsnæðis í þróun.

Reitir leggja áherslu á sjálfbæra uppbyggingu innviða og langtíma leigusambönd þar sem  sameiginlegur ávinningur leigutaka, Reita og samfélagsins eru lykilatriði. Fyrirtækið er almenningshlutafélag skráð í Kauphöll síðan 2015. Eigendur eru að stærstum hluta íslenskir lífeyrissjóðir.