Norsku stelpurnar réttu úr kútnum og völtuðu yfir Dani

Norska liðið mátti þola fjögurra marka tap gegn Svíum í fyrstu umferð og þurftu því á sigri að halda til að hefja stigasöfnunina í riðlinum.

Norsku stelpurnar höfðu algjöra yfirburði í upphafi leiks og náðu strax sex marka forskoti í stöðunni 7-1. Mest náði liðið níu marka forystu í fyrri hálfleik og leiddi að honum loknum með sex mörkum, staðan 14-8.

Dönsku stelpurnar voru í raun aldrei nálægt því að ógna forskoti Norðmanna í síðari hálfleik, og norska liðið vann að lokum öruggan níu marka sigur, 27-18.

Noregur situr nú í öðru sæti riðilsins með tvö stig eftir tvo leiki, jafn mörg og Danir sem sitja í fjórða sæti. Fjögur efstu liðin komast upp úr riðlinum.