„Þetta endar eins og þetta á að enda“

Hann var mun ánægðari með frammistöðu sinna kvenna í dag heldur en í síðust umferð gegn FH. Þó svo að sá leikur hafi unnist með tveimur mörkum gegn engu.

„Miklu betra, héldum boltanum betur, spiluðum betur, en þetta var tricky leikur líka. Leikurinn fyrir úrslitaleik og auðvitað er það einhvers staðar bak við hausinn.“

Framundan er einmitt úrslitaleikur, sem Valur verður að vinna til að verða Íslandsmeistari. Pétur hafði fá orð um hvernig ætti að sækja sigur þar.

„Bara eins og við gerum venjulega á móti Breiðablik.“

Jafnvel inntur eftir frekari útskýringum hélt þjálfarinn spilunum þétt að sér.

„Ég skal segja þér það eftir leikinn.“

Breiðablik vann á Kópavogsvelli í fyrsta leik liðanna í sumar. Valur vann síðan heimasigur í deild og úrslitaleik Mjólkurbikarsins á Laugardalsvelli. Tveir sigrar í röð en það var engin leyniformúla sem Pétur býr yfir sem skilaði því.

„Engin uppskrift að því. Bara tvö góð lið sem eru að berjast um titilinn. Greinilega lang, langbestu liðin í sumar. Svo kemur bara í ljós hvernig þetta endar. Þetta endar eins og þetta á að enda.“

Jafntefli dugir Val ekki, Breiðablik er stigi á undan eins og er. Valur var hins vegar í efsta sæti þegar deildinni var skipt upp og verður því á heimavelli í úrslitaleiknum, sem ætti að gefa liðinu mikið.

„Jájá, það er alltaf betra að spila á heimavelli en útivelli,“ sagði Pétur að lokum.