Orri Steinn Óskarsson kom inn af bekknum hjá Real Sociedad undir lok leiks þegar liðið vann góðan 1-0 sigur á Villareal, Gula kafbátnum, í La Liga - efstu deild karla í spænska fótboltanum.
Eftir markalausan fyrri hálfleik kom Takefusa Kubo heimamönnum yfir snemma í síðari hálfleik með góðu skoti í stöng og inn eftir sendingu frá Mikel Oyarzabal. Reyndist það sigurmark leiksins.
Orri Steinn hefur aðeins skorað tvö mörk í La Liga á leiktíðinni - bæði í 3-0 sigri á Valencia - eftir að vera keyptur til liðsins í blálok félagaskiptagluggans frá FC Kaupmannahöfn. Han kom inn af bekknum á 83. mínútu og hjálpaði Sociedad að sigla sigrinum heim.
Orri Steinn og félagar eru nú með 28 stig í 7. sæti, aðeins tveimur minna en Villareal sem er í 5. sætinu.
