Gagn­rýndu HSÍ: „Höfum ekki efni á að koma svona fram við okkar besta fólk“

Það vakti at­hygli á sínum tíma hversu harðorður Dagur var í garð HSÍ eftir að hafa rætt við forráða­menn sam­bandsins um stöðu lands­liðsþjálfara ís­lenska lands­liðsins en þjálfara­leit stóð þá yfir eftir að sam­starfinu við Guð­mund Þórð Guð­munds­son lauk:

„Ég skil alveg að Guð­mundur Guð­munds­son hafi átt í erfiðu sam­starfi þarna ef þetta eru vinnu­brögðin. Maður hefur eigin­lega áhyggjur af stöðunni þarna,“ sagði Dagur í sam­tali við Vísi á þeim tíma árið 2023 og lýsti því hvernig hann hafði fundað með forráðamönnum HSÍ á kaffi­húsi en síðan hafi ekkert heyrst frá þeim í fimm vikur: „Þetta var vísir að ein­hverju leik­riti og ég skynjaði það mjög snemma,“ bætti Dagur við á sínum tíma.“

„Hægt að setja það alveg feitt á HSÍ“

Um­ræða um akkúrat þetta spratt upp í Fram­lengingunni hjá RÚV þar sem að nýaf­staðið heims­meistaramót í hand­bolta var gert upp hjá ís­lenska lands­liðinu. Helga Margrét Höskulds­dóttir stýrði þættinum og fyrr­verandi lands­liðs­mennirnir Logi Geirs­son, Ólafur Stefáns­son og Kári Kristján Kristjáns­son lögðu sitt matt á mótið þar sem Ís­land fór heim eftir keppni í milli­riðlum á meðan að Dagur fór með króatíska lands­liðið alla leið í úr­slita­leikinn og vann til silfur­verð­launa. Ís­land tapaði aðeins einum leik á mótinu.

Vitað er að Dagur var opinn fyrir því að taka við ís­lenska lands­liðinu með núverandi lands­liðsþjálfaranum Snorra Steini Guðjóns­syni en Dagur var á þessum tíma lands­liðsþjálfari Japan.

„Við tökum áhættuna þegar að við ráðum ungan þjálfara því oftast verða þeir betri þeim mun meira sem þeir hafa lent í. Snorri er rétt að stíga þessi skref sem þjálfari. Og það er okkar ákvörðun sem HSÍ, sem lands­lið, að taka hann,“ segir Ólafur Stefáns­son.

Dagur hefur gert magnaða hluti á sínum þjálfara­ferli, meðal annars gert þýska lands­liðið að Evrópu­meisturum, unnið til verð­launa á Ólympíu­leikunum og nú heims­meistaramóti sem og unnið titla sem þjálfari félagsliða. Hann var til­búin að taka við ís­lenska lands­liðinu en viðræðurnar, sem voru skýrðar út hér fyrir ofan, gáfu ekki góð fyrir­heit.

„Það er hægt að setja það alveg feitt á HSÍ. Dagur var kannski ekki til­búinn að verða lands­liðsþjálfari en hann var til­búinn í að vera jafn­vel með Snorra. Þetta hefði verið allt önnur sena ef þeir hefðu ekki komið fram við hann eins og hann væri sko… ég vil ekki segja það,“ bætti Ólafur við og Logi tók boltann:

„Þeir hittu hann og síðan liðu fimm vikur. Hann sagði sjálfur að hann hefði áhuga á því að taka við liðinu…Hann vildi losna frá Japan, vildi taka við Ís­landi en þeir vildu bara ekki fá hann. Og fólk er að spyrja mig núna hvað hafi eigin­lega gengið á, af hverju var hann ekki ráðinn?“

„Eru það menn með handbolta innsýn?

Þá tók Kári Kristján til máls:

„Hver tekur þessar ákvarðanir? Hver er að ræða við Dag? Er það fram­kvæmda­stjórinn og for­maðurinn? Þá segi ég: Ef það eru fram­kvæmda­stjórinn og for­maðurinn, eru það menn með hand­bolta innsýn? Til þess að taka ákvörðun um það hvort þú ætlir að ráða þennan lands­liðsþjálfara eða ekki.“

Kári segir þetta bara vera dýrt.

„Við erum bara það fá, en erum samt að fram­leiða ótrú­legt magn af færum þjálfurum. En höfum samt ekkert efni á því að koma svona fram við okkar besta fólk. Við bara höfum það ekki.“

„Nei, nei það er þannig,“ svaraði Ólafur og tók undir með Kára.

Sér­fræðingarnir þrír hafa hins vegar bullandi trú á Snorra Steini, núverandi lands­liðsþjálfara.

„Ég hef trú á Snorra,“ segir Ólafur. „Hann mun dreyma þennan leik við Króatíu núna hverja nótt. Kom með ef og hefði og allt það. Hann kemur reynslunni ríkari og fer inn í allt árið núna. Það er bæði Snorra að taka þessa punkta en einnig leik­manna að halda trúnni á að þeir séu medalíu­hópur innan tveggja til þriggja ára.“