Fyrsta tapið í 12 ár

Wolfsburg hefur algjörlega einokað þýsku bikarkeppnina undanfarin ár. Bayern Munchen hefur unnið sína Þýskalandstitla og önnur lið gert sig þar gildandi en það hefur ekki breyst að Wolfsburg vinni bikarinn.

Síðasta vor var fastlega búist við því að Bayern myndi vinna tvöfalt og slá Wolfsburg við í bikarúrslitum eftir að hafa tekið þýska meistaratitilinn en Sveindís Jane fagnaði þá sigri gegn Glódísi Perlu.

Það var því afar óvænt að Wolfsburg hafi tapað 1-0 fyrir Hoffenheim í 8-liða úrslitum keppninnar í gærkvöld og ljóst að nýtt nafn verður ritað á bikarinn í fyrsta skipti í rúman áratug. Wolfsburg hefur unnið bikarkeppnina tíu ár í röð, sleitulaust frá leiktíðinni 2014-15.

Frankfurt var síðast liða, annarra en Wolfsburg, til að vinna keppnina 2013-14. Það var Frankfurt sem sló Wolfsburg úr keppni það árið, í 16-liða úrslitum þann 16. nóvember 2013. Síðan þá hefur Wolfsburg unnið hvern einasta leik, 52 talsins, áður en kom að tapinu fyrir Hoffenheim í gær.

Bayern Munchen þykir langlíklegast til að vinna keppnina í ár. Werder Bremen vann óvæntan sigur á Bayer Leverkusen í gær og eru því þrjú af fjórum efstu liðum þýsku úrvalsdeildarinnar úr leik; Wolfsburg, Frankfurt og Leverkusen.

Eftir standa Hoffenheim og Werder Bremen, sem bæði eru um miðja deild, og B-deildarlið Hamburger SV, auk Bayern Munchen.