Innlent

Slit­lag lagt á síðasta kafla Grafningsvegar

Kristján Már Unnarsson skrifar
Frá Írafossvirkjun. Fjær er Ljósafossvirkjun. Vegarkaflinn sem núna er boðinn út liggur upp brekkuna sem sést ofarlega vinstra megin á myndinni og er 1.330 metra langur.
Frá Írafossvirkjun. Fjær er Ljósafossvirkjun. Vegarkaflinn sem núna er boðinn út liggur upp brekkuna sem sést ofarlega vinstra megin á myndinni og er 1.330 metra langur. Einar Árnason

Vegagerðin hefur boðið út endurbyggingu síðasta ómalbikaða kafla Grafningsvegar, brekkuna á vesturbakka Sogsins sem liggur upp frá brúnni við Írafossvirkjun og í átt að Ljósafossvirkjun. Fyrirhugað er að drífa verkið áfram og skal því að fullu lokið í sumar, fyrir 1. ágúst 2025.

Það raunar vakti undrun margra fyrir fimm árum að umræddur vegbútur skyldi ekki vera kláraður þá, samtímis því sem tveir samtals ellefu kílómetra langir kaflar Grafningsvegar voru lagðir bundnu slitlagi. Þessi eini kafli sem skilinn var eftir er enda örstuttur, aðeins 1,3 kílómetra langur.

Vegarkaflinn liggur meðfram vesturbakka Sogsins.Einar Árnason

Svo mikil var óánægjan að staðarhaldari skátamiðstöðvarinnar á Úlfljótsvatni efndi til undirskriftasöfnunar í sveitinni sumarið 2020 þar sem skorað var á Vegagerðina að ljúka malbikun þessa síðasta kafla Grafningsvegar. Um tvöhundruð manns skrifuðu undir. 

Kvartað var undan því að Vegagerðin hefði árin á undan heflað þennan vegkafla án þess þó að bæta efni í hann. Stórgrýti stæði því upp úr honum öllum og þess á milli væru stórar og leiðinlegar holur.

Grafningsvegur klæddur sumarið 2020.Jakob Guðnason

Í útboðsauglýsingu Vegagerðarinnar er verkið kallað „Grafningsvegur efri (360), Ýrufoss – Grafningsvegur neðri“. Tvöföld klæðning verður lögð á veginn og 390 metra langt vegrið. Tilboðum skal skilað inn rafrænt í síðasta lagi þriðjudaginn 4. mars næstkomandi.

Í frétt Stöðvar 2 sumarið 2019 má heyra íbúa Grafnings fagna fyrirhuguðum vegarbótum:

Grímsnes- og Grafningshreppur Vegagerð Samgöngur Skátar Umferðaröryggi

Tengdar fréttir

Malbikið lengist í Grafningi í sumar

Vegagerðin hefur boðið út endurbyggingu fimm kílómetra langs kafla í Grafningi sunnan Úlfljótsvatns, milli Hlíðarár og Grafningsvegar efri. Vegarkaflinn verður byggður upp og lagður bundnu slitlagi.

Bundið slitlag kemur sunnan Þingvallavatns

Senn líður að því að unnt verði að aka umhverfis Þingvallavatn á bundnu slitlagi en Vegagerðin vinnur nú að endurbyggingu Grafningsvegar milli Nesjavalla og Úlfljótsvatns.

Mest lesið


Fleiri fréttir

Sjá meira


×

Mest lesið