Zlatan segir skammarverðlaunin verðskulduð

Satírski ítalski sjónvarpsþátturinn Striscia la notizia afhendir gyllta tapírinn reglulega. Hann er ætlaður frægu og hátt settu fólki sem gerir stór mistök, er gripið í bólinu eða bara almennt skítur í heyið. Engin regla er á afhendingunni, ekki einn tapír á ári eða slíkt, heldur er tapírinn afhentur eftir þörfum, eins oft og klúður fólks kallar á.

Misvel er tekið í skammarverðlaunin. Fólk á til að hlaupa undan þáttastjórnendum þegar þeir nálgast háttsett með gyllta tapírinn að vopni.

Zlatan er hins vegar öllu vanur, enda var hann að veita tapírnum viðtöku í níunda sinn í gær. Í þetta skipti var það vegna klúðurs félags hans, AC Milan, sem féll óvænt úr leik fyrir Feyenoord í Meistaradeild Evrópu í vikunni.

„Við erum vonsviknir og reiðir. Tapírinn á sannarlega rétt á sér,“ sagði Zlatan meðal annars í stuttu myndbandi sem birt var af afhendingunni á miðlum Striscia la notizia.

Þetta er jafnframt annað árið í röð sem Zlatan fær tapírinn en í fyrra var það vegna rannsóknar ítalskra lögregluyfirvalda á eigendahópi AC Milan. Yfirvöld höfðu þá nýlega rutt sér leið inn á skrifstofur félagsins vegna þeirrar rannsóknar.

Þrátt fyrir að Zlatan þekki vel til tapírsins á hann ekkert í fyrrum liðsfélaga hans hjá AC Milan, Ítalann Antonio Cassano, sem hefur reglulega gripið fyrirsagnirnar af misgáfulegum ástæðum.

Cassano hefur hlotið tapírinn oftast allra, 21 sinni. Líkt og Zlatan kippir hann sér ekki of mikið upp við það og tekur við skammarverðlaununum með bros á vör.