Stein­hissa en verður Dumbledore

Þetta kemur fram í umfjöllun bandaríska miðilsins Screenrant þar sem rætt er við leikarann. Eins og fram hefur komið hefur bandaríska sjónvarpsþáttaverið HBO nú splunkunýja þætti í bígerð sem byggðir verða á Harry Potter bókunum. Verða þættirnir sýndir á HBO Max streymisveitunni.

Muni skilgreina síðasta kafla ævi hans 

Lithgow er fyrsti leikarinn sem staðfest hefur verið að muni leika í þáttunum og virðist vera sem enn hafi ekki verið ráðið í önnur hlutverk. Albus Dumbledore, skólameistari Hogwarts galdraskólans,  var leikinn af Richard Harris í fyrstu tveimur myndunum um galdrastrákinn. Harris féll svo frá og tók Michael Gambon við keflinu í síðustu sex myndunum.

„Ég kom algjörlega af fjöllum með þetta,“ hefur Screenrant eftir leikaranum. Hann segist hafa fengið símtal um málið þar sem hann var staddur á Sundance kvikmyndahátíðinni og segir ákvörðunina um að slá til ekki hafa verið einfalda.

„Vegna þess að þetta mun skilgreina mig síðasta kafla ævi minnar, er ég hræddur um. En ég er mjög spenntur. Þetta er yndislegt fólk sem snýr athygli sinni nú aftur að Harry Potter. Þess vegna hefur þetta verið svona erfið ákvörðun. Ég verð um 87 ára gamall í síðasta partýinu, en ég hef sagt já.“

Fram kemur í umfjöllun miðilsins að tökur á þáttunum muni hefjast í sumar í stúdíói Warner Brothers í Bretlandi, hinu sama og kvikmyndirnar um galdrastrákinn voru teknar upp í. Þegar hefur verið gefið upp að stefnt sé að því að gera sjö seríur, eina seríu fyrir hverja Harry Potter bók. 

Lithgow er 79 ára gamall þegar þetta er skrifað og ljóst að honum hefur verið sagt að verkefnið sem um ræðir muni taka næstu átta ár. Hann er öllum hnútum kunnugur þegar kemur að því að leika Breta en hann hefur meðal annars áður farið með hlutverk breska forsætisráðherrans Winston Churchill í Crown sjónvarpsþáttunum svo fátt eitt sé nefnt.