Land­eig­endur Sólheimasands keyptu gamlan Flugfélagsþrist

Í fréttum Stöðvar 2 var rifjuð upp fréttin frá árinu 2016 þegar flugvélarflakið á Sólheimasandi varð einn vinsælasti ferðamannastaður Suðurlands, landeigendum að óvörum.

Benedikt Bragason, bóndi á Ytri-Sólheimum, sagðist þá hafa búist við því að flakið yrði vinsælt um tíma en síðan myndi þetta ganga yfir.

„En þetta er ekkert búið. Þetta er bara meira og meira," sagði Sólheimabóndinn í viðtalinu sem birtist þann 29. ágúst 2016.

Á ljósmyndum sem Þórir Kjartansson í Vík tók þann 22. nóvember árið 1973, daginn eftir að Varnarliðsvélin nauðlenti á sandinum, má sjá hvernig hún leit þá út. Hún var á leið frá Hornafirði til Keflavíkurflugvallar þegar báðir hreyflar hennar urðu aflvana, að því er talið er vegna ísingar í blöndungi.

Eftir að ljóst varð að henni yrði ekki flogið af sandinum fjarlægði Varnarliðið verðmæti úr vélinni, þar á meðal hreyflana og báða vængina sem og tæki úr stjórnklefa. Skrokkurinn varð hins vegar eftir.

Eftir að flakið varð frægt hafa landeigendur nýtt það til tekjuöflunar og rukka bílastæðagjöld en hafa þó haft áhyggjur af því að það væri að eyðast upp. Og það var einmitt þeirri spurningu sem varpað var fram í viðtalinu sumarið 2016, í ljósi þess að flakið væri að grotna niður, hvort það þyrfti nýtt flak.

„Jú, við erum farnir að svipast um eftir nýju flaki,” svaraði Benedikt bóndi og hló.

Já, þetta var sagt fyrir níu árum. Núna er arftakinn fundinn, í gömlu Varnarliðsflugskýli á Keflavíkurflugvelli. Landeigendafélag Ytri-Sólheima er búið að kaupa gamlan Flugfélagsþrist af Þristavinafélaginu fyrir fjórar milljónir króna, en vélina má sjá hér:

Douglas Dakota-flugvélin var með skrásetningarstafina TF-ISB og hét Gunnfaxi. Gömlu Flugfélagslitirnir virtust enn nokkuð skýrir á skrokknum þegar við skoðuðum flugvélina í skýlinu í Keflavík.

Gunnfaxi flaug síðast árið 1976 en var þá gefinn Landgræðslunni til að nota í varahluti fyrir Pál Sveinsson. Þegar svo Þristavinafélagið fékk Pál Sveinsson að gjöf árið 2005 fylgdi Gunnfaxi með.

Um ástæðu þess að Þristavinafélagið ákvað núna að selja Gunnfaxa segir formaðurinn Tómas Dagur Helgason að félagið hafi ekki lengur haft geymslupláss fyrir flugvélina og hvorki fjármagn né getu til að vera með tvo þrista í sýningarhæfu ástandi. Hinn þristurinn, Páll Sveinsson, áður Gljáfaxi, er varðveittur í Flugsafninu á Akureyri.

Benedikt Bragason á Ytri-Sólheimum segir hugmyndina að flytja Gunnfaxa sem fyrst austur á Sólheimasand og jafnvel að koma honum í upphaflegt útlit Varnarliðsvélarinnar. Hann segir þó ekki fullmótað hvað gert verður.

Benedikt kveðst vera félagi í Þristavinafélaginu. Segist hann vonast til að kaupverðið geti hjálpað félaginu að gera Pál Sveinsson flughæfan að nýju.

Ljósmyndin af Gunnfaxa á Skógasandi vekur óneitanlega þá spurningu hvort ekki mætti varðveita flugvélina í Flugfélagslitum, og jafnvel á samgöngusafninu á Skógum. Benedikt kveðst þó fremur vilja hafa flugvélina sín megin Jökulsár.