Ekkert sam­tal í gangi milli stjórn­valda og sjávar­út­vegs

Í 69 blaðsíðna skýrslu SFS með athugasemdum við frumvarp stjórnvalda um breytingar á veiðigjöldum er meðal annars vísað til greiningar KPMG á neikvæðum áhrifum breytinganna á tekjur sveitarfélaga sem reiða sig á sjávarútveg og einnig til greiningar Jakobsson Capital á áhrifum þeirra á verðmæti þeirra þriggja sjávarútvegsfyrirtækja sem eru á markaði. Guðmundur Kristjánsson forstjóri Brims og formaður samtakanna segir gagnrýnina beinast að vinnubrögðum matvælaráðherra og fjármálaráðherra.

„Þarna koma þeir með drög að frumvarpi sem er illa rökstutt og vantar öll gögn. Það er ekkert farið í hverjar verða afleiðingarnar ef þetta fer í gegn. Þannig að þarna erum við að koma fram með gríðargóða greinargerð um hvað gæti gerst í okkar samfélagi ef þetta á að keyra í gegn eins og þau leggja þetta fram.“

Einhliða tilkynningar frá stjórnvöldum

Guðmundur segir grundvallarspurninguna þá hvort vinna eigi verðmæti úr fiski á Íslandi og skapa sem mesta atvinnu eða þá taka eins há veiðigjöld og hægt er og senda fiskinn óunninn úr landi. Hanna Katrín Friðriksson matvælaráðherra sagði í Sprengisandi á Bylgjunni í vikunni að fulltrúar SFS hefðu setið marga fundi með fulltrúum stjórnvalda en ekki komið með neinar tillögur um það hvernig hægt væri að miða gjöldin við raunverulegt aflaverðmæti.

„Þetta er nú svona frekar léttvægt hjá henni myndi ég segja,“ segir Guðmundur um þá gagnrýni. Hann segir deilur hafa verið um veiðigjöld og auðlindagjöld í áratugi á Íslandi.

„Hér hafa verið skipaðar margar nefndir og núverandi aðferðafræði við útreikning veiðigjalda var fjölda ára í smíðum, við erum búin að breyta henni nokkrum sinnum. Sjávarútvegurinn hefur ekki alltaf verið ánægður með þessa aðferðafræði sem núna, við höfum viljað breyta henni, en ráðherrann hann kallaði okkur bara á fund, tilkynnti okkur hvað hann væri að gera og svo var þetta bara stuttur fundur og við út. Þannig það er ekki komið neitt samtal milli sjávarútvegs og stjórnvalda ennþá af því að þetta hafa bara verið einhliða tilkynningar frá stjórnvöldum.“

Hann segir ábyrgðina að lokum liggja hjá Alþingi. „Það eru alþingismenn Íslendinga sem taka endanlega ákvörðun um það hvort við eigum að vinna fisk á Íslandi eða ekki. Ef alþingismenn ætla ekki að taka tillit til okkar athugasemda, að þá náttúrulega keyrir ríkisstjórnin bara þetta mál í gegn. Mér finndist það óskynsamlegt af ríkisstjórn að setjast ekki niður með okkur og taka spjall við okkur eftir öll þessi rök.“