Rúnar stað­festir að Fram þurfti annan mark­vörð

Eftir tap Fram fyrir ÍBV í Vestmannaeyjum greindi Fótbolti.net frá því að Ólafur Íshólm vildi fara frá félaginu eftir að vera settur á bekkinn. Baðst hann undan að fara með til Eyja þar sem Fram mátti þola 3-1 tap.

Rúnar staðfestir í viðtali við Fótbolti.net að hann hafi kallað Ólaf Íshólm á fund daginn fyrir leik til að segja markverðinum að hann yrði á bekknum líkt og hann var þegar Fram sló FH út úr Mjólkurbikarnum í leiknum áður.

„Ég kalla menn oftast á fund þegar um er að ræða reynslumikla leikmenn og læt þá vita af hverju ég er að gera breytingar,“ segir Rúnar við Fótbolti.net. Viktor Freyr Sigurðsson, sem gekk í raðir Fram fyrir tímabilið, stóð vaktina gegn FH og stóð sig með prýði.

Hinn bráðum þrítugi Ólafur Íshólm hefur verið hjá Fram síðan 2019 og var varafyrirliði liðsins um stund. Það breyttist með breyttum áherslum dómarastéttarinnar þegar aðeins fyrirliði má ræða við dómara leiksins, þá er erfitt að hafa markvörð sem fyrirliða.

Í lok viðtalsins staðfestir Rúnar að Fram þurfi annan markvörð þar sem varamarkvörður liðsins nú er enn í 2. flokki og hefur aldrei spilað í efstu deild.

„Þú vilt alltaf fá eins góðan leikmann og hægt er til þín, en hvað kostar nýr leikmaður? Hvað er hægt að gera? Það þarf að velta öllum möguleikum fyrir sér.“

Ekki er ljóst hvað Ólafur Íshólm gerir. Hann hefur leikið fyrir Fylki og Breiðablik ásamt Fram á ferli sínum. Alls á hann að baki 110 leiki í efstu deild.