Lífið

Segist hafa gert merka upp­götvun nú þegar hann „nálgast enda­lok lífs“ síns

Magnús Jochum Pálsson skrifar
David Attenborough á meira en sjötíu ára feril að baki í sjónvarpi og kvikmyndum. Hann hefur unnið ómælda vinnu fyrir náttúruvernd.
David Attenborough á meira en sjötíu ára feril að baki í sjónvarpi og kvikmyndum. Hann hefur unnið ómælda vinnu fyrir náttúruvernd. Getty

Náttúrufræðingurinn David Attenborough beinir sjónum sínum að höfum jarðar í nýjustu heimildamynd sinni en lítur líka um öxl yfir ævistarf sitt nú þegar hann nálgast „endalok lífs“ síns. Hann segir hafið spila lykilrullu í baráttunni við hamfarahlýnun.

Heimildamyndin Ocean, eða Hafið, kemur í bíóhús um allan heim 8. maí næstkomandi, á 99 ára afmæli Attenborough. Hafið fjallar um skaðleg áhrif botnvörpuveiða og stöðu hafsins í ljósi hamfarahlýnunar. 

Átta ár eru liðin frá því Blue Planet II komu út en þættirnir fjölluðu um höf jarðar og leiddu til vitundarvakningar víða um heim um plastmengun í sjónum.

„Þegar ég sá hafið í fyrsta skipti sem ungur drengur leit ég á það sem gríðarstóra víðáttu sem þyrfti að temja og ná valdi á mannkyninu til hagsbóta. Nú þegar ég nálgast endalok lífs míns, vitum við að hið gagnstæða er satt. Eftir að hafa lifað í nærri hundrað á þessari plánetu skil ég núna að mikilvægasti staðurinn á jörðinni er ekki á landi heldur sjó,“ segir Attenborough í klippu úr myndinni.

„Það sem við höfum uppgötvað gæti breytt öllu“

Attenborough segir að þó menn hafi rannsakað hafið allt hans líf sé það ekki fyrr en nú að mannkynið geri sér grein fyrir mikilvægi hafsins fyrir framtíðina.

„Það sem við höfum uppgötvað gæti breytt öllu,“ segir Attenborough. „Hafið er lífbúnaður plánetunnar okkar og helsti bandamaður okkar í baráttunni gegn hamfarahlýnun. Samt er það á krossgötum, við erum að sjúga lífið úr hafinu.“

Attenborough segir hafið svo illa statt að hann eigi erfitt með að missa ekki alla von. Ein merkasta uppgötvun allra tíma komi í veg fyrir það.

„Hafið getur jafnað sig hraðar en við gátum nokkurn tímann ímyndað okkur,“ segir Attenborough. Mannkynið hafi þannig fengið líflínu: „Ef við björgum hafinu, björgum við heiminum okkar. Eftir að hafa myndað plánetuna ævilangt er ég viss um að ekkert sé mikilvægara.“

Hafið verður sýnd þrisvar sinnum í Smárabíói fyrir almenna gesti en 9. maí verður sérstök Íslandsfrumsýning á vegum Icelandic Wildlife Fund, Landverndar, Náttúruverndarsamtaka Íslands og NASF sem Toby Nowlan, leikstjóri myndarinnar, verður viðstaddur.


Tengdar fréttir

Attenborough berst áfram fyrir jörðina

Náttúruvísinda- og sjónvarpsmaðurinn Sir. David Attenborough heldur ótrauður áfram í baráttu sinni fyrir lífríki jarðar en hann kemur til með að fagna 93 ára afmæli sínu í næsta mánuði.

David Attenborough: Heimshöfunum aldrei verið ógnað jafn mikið

Attenborough mun vekja athygli í þessu í lokaþætti þáttaraðar sinnar Blue Planet 2. Í þættinum mun hann fjalla ítarlega um hvaða áhrif loftslagsbreytingar, plastmengun, ofveiði og jafnvel hávaði hefur á heimshöfin og lífríki þeirra.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.