Gummi Tóta skoraði fyrir armensku meistarana

Leikurinn var í meira lagi fjörugur og sá fimm mörk í fyrri hálfleik. Noah lenti undir eftir aðeins tíu mínútur, komst yfir en fékk svo tvö mörk á sig rétt fyrir hálfleik og fór inn í búningsherbergi 3-2 undir.

Gummi Tóta kom liðinu hins vegar til bjargar með marki í upphafi seinni hálfleiks, meira var ekki skorað og 3-3 jafntefli varð niðurstaðan.

Vinstri bakvörðurinn hefur komið við sögu í tólf deildarleikjum á tímabilinu en þetta var hans fyrsta mark, stoðsendingarnar eru fjórar talsins.

Noah varð armenskur meistari með yfirburðum, liðið er með tólf stiga forystu á toppi deildarinnar þegar aðeins tvær umferðir eru eftir óspilaðar.

Ararat er í öðru sætinu en sigurvegarar síðustu tveggja tímabila, Urartu og Pyunik, eru í þriðja og fjórða sæti.