Fótbolti

Fyrrum for­seti Inter látinn og liðið mun leika með sorgarbönd

Ágúst Orri Arnarson skrifar
Ernesto Pellegrini hefur alla tíð verið vel metinn af stuðningsmönnum Inter.
Ernesto Pellegrini hefur alla tíð verið vel metinn af stuðningsmönnum Inter. inter

Leikmenn Inter munu spila með sorgarbönd á handleggnum í úrslitaleik Meistaradeildarinnar í kvöld, til minningar um fyrrum eiganda og forseta félagsins, Ernesto Pellegrini, sem féll frá í morgun.

Ítalski miðillinn Gazzetta dello Sport greinir frá eftir að Inter tilkynnti um andlátið í morgun.

Ernesto Pellegrini eignaðist hlut í Inter árið 1979 og keypti svo meirihluta í félaginu árið 1984. Hann skipaði sjálfan sig forseta og leiddi félagið næstu ellefu ár með stórgóðum árangri. Eitt hans fyrsta verk var að gefa stuðningsmönnum ókeypis samlokur og drykki á bikarleik árið 1985, sem gerði hann afar vinsælan á San Siro. 

Undir hans eignarhaldi keypti Inter svo leikmenn á borð við Lothar Matthaus, Jurgen Klinsmann, Andreas Brehme og Karl-Heinz Rummenigge og vann til fjölda verðlauna.

Meðal annars setti Inter stigamet í ítölsku úrvalsdeildinni tímabilið 1988-89 og vann svo UEFA bikarinn, undanfara Evrópudeildarinnar, árin 1991 og 1994.

Ernesto Pellegrini var vígður inn í frægðarhöll Inter árið 2020 í þakklætisskyni við störf hans fyrir félagið. Hann féll frá í morgun, 84 ára að aldri.

Inter leikur úrslitaleik Meistaradeildarinnar við PSG, klukkan sjö í kvöld. Til minningar um mætan mann munu leikmenn Inter bera sorgarbönd á handleggnum.




Fleiri fréttir

Sjá meira


×