Íslenski boltinn

„Þá verður þú bara að taka höggin“

Sindri Sverrisson skrifar
Lárus Orri Sigurðsson var með skýr tilmæli til Gunnars Vatnhamars um að hann hefði alveg getað sleppt því að leggjast niður, í aðdraganda þriðja marks Breiðabliks.
Lárus Orri Sigurðsson var með skýr tilmæli til Gunnars Vatnhamars um að hann hefði alveg getað sleppt því að leggjast niður, í aðdraganda þriðja marks Breiðabliks. Samsett/Stöð 2 Sport

Lárus Orri Sigurðsson var alls ekki hrifinn af tilraunum varnarmanna Víkings til að krækja í aukaspyrnur í stórleiknum gegn Breiðabliki á sunnudaginn, í Bestu deild karla í fótbolta.

Lárus fór yfir þetta í Stúkunni á Stöð 2 Sport í gærkvöld þar sem menn skoðuðu meðal annars þriðja mark Breiðabliks í leiknum. 

Sölvi Geir Ottesen, þjálfari Víkinga, var sannfærður um að Tobias Thomsen hefði brotið á Gunnari Vatnhamar í aðdraganda marksins en Lárus var hjartanlega sammála því mati dómarans að dæma ekki neitt. Umræðuna má sjá í spilaranum hér að neðan.

Klippa: Stúkan - Varnarmenn Víkinga

Sérfræðingarnir skoðuðu fleiri dæmi um það þegar varnarmenn Víkings reyndu að fá aukaspyrnu og vanþóknun Lárusar var nánast áþreifanleg þegar hann sá fíleflda leikmenn hrynja niður:

„Varnarmenn þeir bara geta ekki leyft sér þetta. Alveg sama hvað Sölvi segir í viðtali. Ég er pottþéttur á því að hann er búinn að tala við sína varnarmenn og segja við þá: Þetta gerið þið ekki meira. Þú getur ekki leyft þér þetta. Þú verður bara að standa. Ef það koma högg á þig þá verður þú bara að taka höggin. Þú verður bara að verjast og getur svo kvartað þegar sóknin er búin,“ sagði Lárus og talaði svo sérstaklega um aðdraganda þriðja marks Blika:

„Auðvitað er þetta ekki aukaspyrna. Þetta er aldrei aukaspyrna. En eins og fótboltinn er að þróast hjá okkur í dag þá eru menn farnir að kalla eftir aukaspyrnum á alls konar hluti.“




Fleiri fréttir

Sjá meira


×