Var lengi hikandi að selja Ratcliffe laxveiðijarðirnar

Í fréttum Stöðvar 2 og þættinum Ísland í dag er rætt við Íslendinga sem fluttu til Lúxemborgar til að vinna hjá Cargolux en efnuðust síðar við störf á öðrum vettvangi. Þannig gerðist flugstjórinn Jóhannes Kristinsson fjárfestir en mikla athygli vakti á sínum tíma þegar hann keypti laxveiðijarðir í röðum í Vopnafirði.

„Ég hef náttúrlega alltaf haft áhuga á veiði og ég sá bara tækifæri í Vopnafirði,“ segir Jóhannes.

Með gerð laxastiga lengdi hann veiðisvæðin og jók þannig verðmæti laxveiðiánna. En svo kom Jim Ratcliffe í spilið.

Jóhannes lýsir því hvernig það kom til að hann og Ratcliffe gerðust viðskiptafélagar. Ratcliffe hafi þrýst á að fá að kaupa jarðirnar en Jóhannes segist hafa verið tregur til að selja. Hann hafi þó fallist á að selja honum þrjátíu prósent til að skoða hann.

Þremur árum síðar segist Jóhannes hafa verið orðinn sannfærður um það að Ratcliffe væri einstakur náttúrusinni og stæði af heilum hug á bak við þá hugsjón að vernda laxastofninn.

Við heyrum meira af viðskiptaævintýrum Íslendinga í Lúxemborg í þættinum Ísland í dag:

Einar Ólafsson, fyrsti forstjóri Cargolux, segir frá því hvernig það kom til að tveir af flugvirkjum hans, þeir Birkir Baldvinsson og Gunnar Björgvinsson, létu af störfum en þeir áttu báðir eftir að auðgast á eigin viðskiptum með flugvélar og flugvélavarahluti.

Einar segir jafnframt frá ferli sínum eftir að hann lét sjálfur af störfum hjá Cargolux. Hann fór þá til flugvélaleigu í Bandaríkjunum, Guinnes Peat Aviation, gerði þar ábátasama samninga og fékk vænan starfslokasamning. Einar stofnaði síðar flugfélagið Bláfugl ásamt fleirum.

Heimkominn til Íslands keypti hann tvær samliggjandi jarðir á sunnanverðu Snæfellsnesi og gerðist hrossabóndi.

„Já, gerðist hrossabóndi og var með hrossabú upp á hundrað hross. Heyjaði sjálfur og plægði og sáði,“ segir Einar.

Meira í spilaranum ofar í fréttinni.