Annar þing­maðurinn látinn og byssumannsins enn leitað

Hinn grunaði árásarmaður heitir Vance Boelter og er 57 ára gamall bandarískur ríkisborgari. Hann er grunaður um að hafa dulbúið sig sem lögreglumann áður en hann fór á heimili Hortmann og Hoffman og skaut þingmennina tvo og maka þeirra. 

Rannsóknarlögregla fann samkvæmt frétt CNN svokallaðan aftökulista með sjötíu nöfnum í bíl mannsins, sem hann hafði dulbúið sem lögreglubíl. Á listanum voru að mestu leyti nöfn Demókrata eða baráttusinna fyrir réttinum til þungunarrofs. 

Lögregla býður hverjum sem getur veitt upplýsingar um ferðir hans fimmtíu þúsund Bandaríkjadali í laun, sem samsvara 6,2 milljónum króna.

John Hoffman þingmaður í öldungadeild ríkisþings Minnesota og eiginkona hans voru skotin af sama manni en lifðu bæði af. 

Tim Walz ríkisstjóri Minnesota og fyrrverandi varaforsetaefni Kamölu Harris, segir ljóst að kveikjan af verknaðinum hafi verið pólitísk.