Sjáðu Bayern takast það sem engum hafði tekist

Bayern vann 2-1 sigur gegn Boca Juniors í Miami og öfugt við suma aðra leiki á mótinu var þétt setið á leikvanginum og mikil stemning. Helstu atvik úr leiknum má sjá hér að neðan.

Bayern var mun sterkari aðilinn í fyrri hálfleik en komst þó aðeins í 1-0 með marki frá Harry Kane. Áður hafði liðið reyndar skorað beint úr hornspyrnu en markið var að lokum dæmt af eftir skoðun í varsjá, þar sem Serge Gnabry þótti hafa brotið á markverði Boca.

Argentínska liðið jafnaði metin um miðjan seinni hálfleik eftir magnaðan sprett Miguel Merentiel en það dugði þó ekki því Michael Olise skoraði sigurmark Bayern skömmu fyrir leikslok. Fyrsta tap suður-amerísks liðs á mótinu því staðreynd.

Bayern hefur unnið báða leiki sína í C-riðli og er komið áfram í 16-liða úrslit ásamt brasilíska liðinu Flamengo sem er efst í D-riðli. Bayern á eftir leik við Benfica á þriðjudaginn og nú þarf Boca að treysta á að Bayern vinni þann leik, og vinna stóran sigur á nýsjálenska liðinu Auckland City, til að komast áfram í 16-liða úrslitin.