Biðla til FIFA um að hætta við miðdagsleiki af ótta við hita

Samtökin, sem eru með yfir 70 þúsund atvinnumenn undir sínum hatti, gáfu frá sér skýrslu á dögunum þar sem þau nefna þrjár borgir þar sem „gríðarleg hætta“ (e. extremely high risk) á meiðslum og öðru tengdu hitanum getur átt sér stað þegar heimsmeistaramótið fer fram í Bandaríkjunum, Mexíkó og Kanada á næsta ári.

Borgirnar eru Kansas og Miami í Bandaríkjunum og Monterrey í Mexíkó. Raunar nefnir skýrslan einnig Atlanta, Dallas og Houston í skýrslunni, en samtökin gera ekki ráð fyrir jafn mikilli hættu fyrir leikmenn og áhorfendur á þeim völlum, þar sem þar er hægt að draga þak yfir velloina og loka þar með á hitann.

Þá hafa fimm borgir verið skilgreindar sem „ mjög mikil hætta“ (e. very high risk) eða „mikil hætta“ (e. high risk), en það eru Boston, Philadelphia, Guadalajara, Los Angeles og New York.

Nú þegar eru dæmi um að mikill hiti á leikjum sem fara fram um miðjan dag setji strik í reikninginn í Bandaríkjunum. Á heimsmeistaramóti félagsliða, sem nú fer fram, segir FIFPRO að aldrei hefði átt að leyfa leikjunum milli Chelsea og Esperance de Tunis annars vegar, og PSG og Atlético Madrid hins vegar, að fara fram um miðjan dag í slíkum hita.

FIFPRO hefur nú þegar sent alþjóðaknattspyrnusambandinu FIFA erindi þar sem samtökin viðra áhyggjur sínar. Samtökin óttast hins vegar að ekki verði hlustað á þær áhyggjur sökum þess að of miklir peningar séu í spilinu. Til að mynda sé mikil pressa á FIFA að sem flestir í heiminum geti horft á leikina og þá séu leikir um miðjan dag til dæmis á ágætis tíma fyrir þá sem horfa á mótið í Asíu.