Hand­tóku stjórn­endur sjúkra­hússins vegna ætlaðra barns­drápa

Handtökurnar tengjast máli Lucy Letby, hjúkrunarfræðings á fertugsaldri, sem var sakfelld fyrir að verða sjö börnum að bana og reyna að drepa sjö til viðbótar. Til rannsóknar er nú hvort að stjórnendur sjúkrahússins hafi gerst sekir um stórfellda vanrækslu í tengslum við dauða barnanna, að því er segir í frétt The Guardian.

Paul Hughes, aðstoðaryfirlögregluþjónn hjá lögreglunni í Cheshire, sagði í gær að rannsóknin beindist að því hvort að háttsettir stjórnendur sjúkrahússins hefðu gerst sekir um glæp í viðbrögðum sínum, eða athafnaleysi, við tíðum dauðsföllum á nýburadeild. Mögulegar sakir á hendur þeim hefðu ekki áhrif á mál Letby.

Stjórnendurnir þrír voru allir látnir lausir gegn tryggingu að loknum skýrslutökum.

Saksóknarar segjast jafnframt meta hvort að Letby verði ákærð vegna fleiri atvika sem eigi að hafa átt sér stað þegar hún starfaði í Liverpool frá 2012, að því er segir í frétt breska ríkisútvarpsins.

Reynir að fá málið tekið upp

Letby hefur í tvígang reynt að fá sakfellingu sinni hnekkt án árangurs en lögmenn hennar reyna nú að fá opinbera eftirlitsnefnd um sakamál til þess að skoða málið.

Verjendur Letby hafa leitt fram tugi alþjóðlegra sérfræðinga sem telja að gögn málsins bendi ekki til þess að hún hafi ráðið börnunum bana. Einn þeirra gagnrýndi lögregluna fyrir að tilkynna um handtökurnar á viðkvæmum tíma þar sem eftirlitsnefndin kannaði mál Letby.

Bent hefur verið á að málið gegn Letby byggði að stórum hluta á ótækum tölfræðilegum forsendum. Byggt var á fylgni á milli dauða barnanna og þess hvenær Letby var á vakt en tölfræðingar hafa gagnrýnt að aðeins þau tilfelli sem studdu málstað saksóknara hefðu verið týnd til þar.

Einn sérfræðinganna sem lögmenn Letby tefla fram nú segir að saksóknarar í máli hennar hafi rangtúlkað rannsókn hans. Gagnrýndi hann að saksóknarar hefðu ályktað að banamein barnanna væri blóðtappi sem Letby hefði valdið með því að sprauta lofti í blóðrás í þeirra. Börnin hefði ekki verið með dæmigerð einkenni slíkra blóðtappa og gagnrýndi hann ennfremur að það hefði verið talið banamein barnanna á þeim forsendum að aðrar orsakir hefðu verið útilokaðar.

Fram hefur komið að aðstæður á deildinni þar sem Letby starfaði hefðu verið slæmar. Þar hafi skort viðeigandi tækjabúnað og þjálfað starfsfólk og mikið álag hafi verið á læknum og hjúkrunarfræðingum. Þá var árið 2015, árið sem Letby á að hafa byrjað að drepa börn, það fyrsta í heild öld þar sem ungbarnadauði jókst.

Fréttin hefur verið uppfærð.