Þor­steinn um frá­fall Jota: „Sorg­legar fréttir“

Íslenska fjölmiðlateymið á EM í Sviss beið þess að íslenska landsliðið mætti á æfingasvæðið hjá FC Allmendingen í Thun fyrir æfingu dagsins þegar að bárust af því fréttir að Diogo Jota, leikmaður Liverpool og portúgalska landsliðsins hefði látið lífið ásamt bróður sínum.

Jota og Silva létust í bílslysi í nótt á A-52 þjóðveginum í Zamora-héraði á Spáni, rétt norðan við Portúgal. Jota var 28 ára gamall en Silva tveimur árum yngri. Jota hefur leikið 49 landsleiki fyrir hönd portúgalska landsliðsins en Silva lék fyrir Penafiel í Portúgal.

Eðlilega slógu fréttirnar alla. Íslenska landsliðið mætti á æfingasvæðið og viðtöl tóku við. Svona fréttir minna mann á það hvað lífið er brothætt og stutt á milli. Setur hlutina í stærra samhengi. 

Kvöldið áður hafði íslenska liðið upplifað kvöld vonbrigða í fyrsta leik sínum á EM sem lauk með tapi gegn Sviss. Frammistaðan undir væntingum og þung spor að stíga. 

En við svona áfall eins og fráfall Jota, sem lifði og hrærðist í heimi fótboltans, er ekkert óeðlilegt að tíðindi eins og úrslit leikja, frammistaða liða, vonbrigði og svekkelsi víki til hliðar. 

„Fótbolti er skemmtun og afþreying, að hluta til," sagði Þorsteinn landsliðsþjálfari í viðtali við íþróttadeild Sýnar fyrir æfingu í morgun. 

„Miðlarnir búa til afþreyingarefni og svo framvegis. En svo getur alltaf lífið sjálft komið fyrir, sem er alltaf í miklu stærra samhengi heldur en nokkurn tímann það að spila fótboltaleik. Auðvitað eru þetta sorglegar fréttir en ekkert mikið sem ég get sagt um það annað.“