„Að hlusta á ræður hjá henni gefur mér enn gæsa­húð“

Elísabet var ráðin landsliðsþjálfari Belga í janúar og Björn kom svo inn í þjálfarateymið í vor og er því mættur til starfa á stórmóti í fyrsta sinn. Björn flutti ásamt konu sinni Sif Atladóttur, fyrrverandi landsliðskonu, frá Svíþjóð til Íslands í lok árs 2021, þjálfaði á Selfossi og var aðstoðarþjálfari Víkings, en gat stokkið strax til þegar „Beta“ fékk nýtt starf og kallaði eftir kröftum hans:

„Ætli við getum án hvors annars verið? Ég veit það ekki. Nei, þetta var nú bara þannig að ein úr þjálfarateyminu hjá Belgíu var ansi langt gengin með barn og það vantaði manneskju til að hlaupa í skarðið fyrir hana. Ég hef greinilega gert eitthvað vel því þetta þróaðist út í það að ég fékk að halda áfram með liðinu,“ sagði Björn við hótel belgíska landsliðsins í Saillon í gær.

Viðtalið má sjá hér að neðan.

Þó að dæmið hafi ekki gengið upp hjá Belgum á EM (töp gegn Ítalíu og Spáni þýða að liðið er á heimleið líkt og Ísland) þá er Björn sannfærður um að Beta sé rétti aðilinn til að færa liðið upp á næsta stig, og til að mynda koma því á HM í Brasilíu 2027:

„Ástríðan er það sem hefur fleytt henni svona ótrúlega langt“

„Mér finnst hún bara geggjuð. Ég vann með henni í ellefu ár í Kristianstad og að sitja daginn fyrir leik og hlusta á ræður hjá henni gefur mér ennþá gæsahúð, og fær mig almennilega í gang, sem segir ansi mikið um hana og hvaða tengingu ég hef við hana,“ sagði Björn en finnst honum Beta hafa fundið nýja ástríðu í fyrsta landsliðsþjálfarastarfinu?

„Ég held að ástríðan sé alltaf til staðar. Mér fannst hún aldrei vera að dofna í Kristianstad. Hins vegar var kannski kominn tími fyrir hana til að sleppa þessu 15 ára gamla barni sínu sem Kristianstad var. En ástríðan er það sem hefur fleytt henni svona ótrúlega langt sem þjálfari, umfram það sem margir hafa varðandi knattspyrnukunnáttu,“ sagði Björn.

„Steini búinn að standa fína plikt“

Beta átti í viðræðum við þáverandi forráðamenn KSÍ um að taka við íslenska landsliðinu árið 2021 áður en ákveðið var að semja frekar við Þorstein Halldórsson, núverandi þjálfara liðsins. En telur Björn að Íslendingar hafi misst af miklu þegar tækifærið var ekki nýtt til að ráða Betu?

„Já og nei. Steini er búinn að standa fína plikt þarna. Ég veit að það eru alltaf gerðar miklar væntingar til íslenska landsliðsins, út af einhverju sem hefur gerst áður. Við eigum fullt af góðum leikmönnum. En það er ekki hægt að smella fingrum og láta allt smella saman. Hins vegar trúi ég bara svo mikið á Betu að ég trúi því að hún geti náð árangri hvar sem er.“

Langar að mæta Íslandi í Ríó

Hann útilokar ekki að einhvern tímann í framtíðinni eigi þau Beta eftir að stýra íslenska landsliðinu:

„Það væri rosa gaman að gera það einhvern tímann já,“ sagði Björn. „Það er skrýtið að standa með merki annars lands á brjóstinu á sér og vera stoltur Belgi allt í einu. Á sama tíma er ég búinn að fara á leikina hjá Íslandi og verið svekktur yfir úrslitunum.“

Sá möguleiki var til staðar að Ísland og Belgía myndu mætast í 8-liða úrslitum á EM. Og ef allt gengur upp hjá báðum liðum er svo sem ekki útilokað að þau mætist á HM í Brasilíu 2027: „Það væri náttúrulega bara geggjað, að taka leik við Ísland í Ríó.“