Enn leik­maður KR en nú lánaður til Lyng­by

Jakob Gunnar kemur frá Húsavík en samdi við KR á síðasta ári eftir að hafa farið mikinn með Húsvíkingum í 2. deildinni. Völsungur fór á endanum upp úr 2. deildinni en Jakob Gunnar hélt í Vesturbæinn.

Hann fékk þó aldrei tækifæri í Bestu deildinni en var lánaður innan borgarmarkanna til Þróttar sem leikur deild neðar. Þar skoraði hinn 18 ára framherja nokkur mörk en vann sér þó aldrei inn fast sæti í byrjunarliði Sigurvins Ólafssonar þjálfara.

Jakob Gunnar mun ekki spila fleiri leiki fyrir Þrótt þar sem hann hefur nokkuð óvænt samið við Íslendingalið Lyngby sem leikur í B-deildinni í Danmörku. Hann mun þó, fyrst um sinn allavega, leika með U-19 ára liði félagsins.

Þar hittir hann fyrir þjálfarann Michael John Kingdon en sá hefur starfað fyrir Knattspyrnusamband Íslands og Fylki.

Þegar það virtist sem Íslendingatenging Lyngby væri að fjara út þá gerðist Vigfús Arnar Jósepsson, fyrrverandi þjálfari Leiknis Reykjavíkur og aðstoðarþjálfari KR, njósnari hjá félaginu. Skömmu síðar færði Michael John sig úr Árbænum til Kaupmannahafnar og svo kom Ísak Snær Þorvaldsson á láni frá Rosenborg á dögunum.

Ísak Snær byrjar af krafti og skoraði í sínum fyrsta leik fyrir félagið. Nú er bara að bíða og sjá hvort Jakob Gunnar fái tækifæri með aðalliði Lyngby í B-deildinni í Danmörku áður en hann fær tækifæri í Bestu deildinni með KR.

Lánsamningurinn gildir út tímabilið í Danmörku eða fram á sumar 2026.