Funda með ráð­herra vegna tollanna: „Ég ætla ekki að setjast í neitt dómara­sæti“

Evrópusambandið hyggst leggja verndartolla á járnblendi og kísiljárn frá meðal annars Íslandi og Noregi. Þeir munu taka gildi að óbreyttu eftir þrjár vikur en formlegt samtal á milli Íslands og ESB fer nú í hönd. Elkem á Grundartanga er eini framleiðandi kísiljárns hér á landi.

Fjöldi starfa undir

Ólafur Adolfsson, Sjálfstæðismaður og fyrsti þingmaður Norðvesturkjördæmis, boðar til fundarins með samþingmönnum sínum úr kjördæminu. Þorgerður Katrín Gunnarsdóttir utanríkisráðherra hefur boðað komu sína.

„Það stendur til að fá frekari upplýsingar um stöðu mála varðandi þessar tollaálögur og hvernig okkur gengur í því að fá þessu breytt,“ segir Ólafur Adolfsson, þingmaður Sjálfstæðisflokksins, um fundinn fyrirhugaða. 

Þingmenn Norðvesturkjördæmis sem Ólafur hefur rætt við séu áhyggjufullir vegna málsins, og voni allir að ekki komi til álagningar tollanna. Mörg störf séu undir, fari allt á versta veg.

„Ég held að beinu störfin séu rétt um 200 og síðan afleidd störf auðvitað. Það eru gríðarleg verðmæti sem þarna er verið að flytja erlendis.“

Sest ekki í dómarasætið

Tekist hefur verið á um hvort utanríkisráðherra hafi upplýst utanríkismálanefnd um fyrirætlanir Evrópusambandsins um tollana, á fundi nefndarinnar í kjölfar heimsóknar forseta framkvæmdastjórnar ESB hingað til lands.

Ráðherra segist hafa gert það, en þingmenn stjórnarandstöðunnar halda hinu gagnstæða fram. Ólafur segir þingmenn í kjördæmi sínu gera eðlilega kröfu um að vera upplýstir þegar miklir hagsmunir séu undir.

„En þegar um er að ræða trúnaðarupplýsingar þá getur verið vandmeðfarið hvenær á að færa þær í loftið, og hvenær menn telja að það þjóni hagsmunum að það sé gert. Þannig að ég ætla ekki að setjast í neitt dómarasæti með það.“

Málið komi þó nokkuð óvænt upp.

„Og að vitneskjan skuli hafa verið til í svolítinn tíma, það vekur hjá mér ákveðnar spurningar um hvernig við ætlum að halda á þessum málum.“