Alaska Air­lines hefur dag­legt flug til Kefla­víkur næsta sumar

Í tilkynningu frá Isavia segir að áætlað sé að fyrsta koma verði 29. maí og verði flogið daglega frá heimaflugvelli Alaska Airlines, Seattle-Tacoma (SEA) sem sé mikilvægur tengiflugvöllur fyrir vesturhluta Bandaríkjanna og Kanada.

„Við tökum fagnandi á móti Alaska Airlines sem mun styrkja enn frekar flugtengingar Keflavíkurflugvallar við Norður-Ameríku í gegnum heimavöll þeirra í Seattle. Með þessu mun valkostum þeirra sem vilja heimsækja Ísland og nota KEF sem tengistöð fjölga,“ er haft eftir Guðmundi Daða Rúnarssyni, framkvæmdastjóra viðskipta og þróunar á Keflavíkurflugvelli. „Eftirspurn eftir flugi frá Norður Ameríku heldur áfram að vaxa og koma Alaska Airlines sýnir aðdráttarafl Íslands sem einstaks áfangstaðar og hversu öflug tengistöðin í Keflavík er orðin.“

Keflavíkurflugvöllur verður einn af fyrstu áfangastöðum Alaska Airlines í Evrópu frá og með næsta sumri. 

„Ísland verður ávallt á óskalista ævintýragjarnra ferðalanga og útivistarfólks, ásamt því að Keflvíkurflugvöllur verður gestum okkar mikilvægur tengipunktur við Evrópu,“ er haft eftir Ben Minicucci, forstjóra Alaska Airlines. Hann segir að með beinu flugi til KEF næsta sumar sé flugfélagið að stíga mikilvægt skref í átt að framtíðarsýn félagsins um að tengja gesti sína við heiminn með framboði í alþjóðaflugi.

Í tilkynningunni segir að Seattle-Tacoma (SEA) sé mikilvægur tengiflugvöllur fyrir vesturströnd Bandríkjanna og víðar í Norður-Ameríku. „Alaska Airlines eru stærsta flugfélag vallarins og bjóða yfir 300 brottfarir daglega til 60 áfangastaða í Norður-Ameríku, meðal annars allra helstu borga vesturstrandar Bandaríkjanna. Með komu Alaska Airlines opnast því betri tengingar fyrir ferðalanga sem vilja heimsækja Ísland eða nýta KEF sem tengistöð við áfangastaði í Evrópu.“