„Upp­lifi þetta mál sem fjöl­skyldu­harm­leik“

Kári fór yfir það í löngu máli í hlaðvarpsþættinum Handkastið fyrir helgi hvernig nú væri svo komið að hann hygðist aldrei aftur ætla að spila í handboltabúningi ÍBV, eftir að hafa verið fyrirliði og leikjahæsti leikmaður liðsins.

Ástæðan er framkoma forsvarsmanna handknattleiksdeildar ÍBV í garð Kára í viðræðum um mögulegan nýjan samning. Nefndi Kári til að mynda að menn hefðu hreinlega gert ráð fyrir því að vegna veikinda myndi hann ekki geta snúið aftur á völlinn, án þess að hann væri sjálfur spurður út í það.

Þá hafi munnlegt samkomulag um að hann yrði spilandi aðstoðarþjálfari orðið að engu, án þess að menn virtust treysta sér til að segja Kára það hreint út og liðu að hans sögn tveir mánuðir í sumar án þess að rætt væri við hann, áður en loks kom í ljós að ekki stæði til að gera við Kára samning.

Þá kom Kári inn á það að þegar hann missti móður sína úr krabbameini í vor hefði honum, fyrirliða ÍBV, ekki borist svo mikið sem samúðarskeyti frá félaginu sem hann þó hefði þjónað um árabil.

Kári og Rúnar urðu meðal annars Íslandsmeistarar saman hjá ÍBV og léku einnig saman með íslenska landsliðinu. Rúnar segir frá því í færslu á Facebook hve vonsvikinn hann sé vegna viðskilnaðs Kára við ÍBV og lýsir málinu sem fjölskylduharmleik.

„Nú á ég ekkert með það að gera að segja íþróttafélögum hvernig þau eiga að reka sig og ÍBV ber engin skylda til að semja við hann Kára vin minn.

En mér finnst persónulega skipta máli að ef ákvörðunin er að láta leiðir skilja af hálfu félagsins, þá á bara að segja það, augnliti til augnlitis sama hversu erfitt eða óþægilegt það samtal er,“ skrifar Rúnar og heldur áfram:

„Mér finnst það morgunljóst að Kári er sá handknattleiksmaður sem kemur frá Eyjum sem hefur náð hvað lengst, er stærsti prófíll handboltans frá Eyjum og ofan á það hefur hann unnið fyrir ÍBV af heilindum í fjölda mörg ár. Langt umfram laun eða starfslýsingar.

Ég upplifi þetta mál sem fjölskylduharmleik og það er erfitt og leiðinlegt að fylgjast með því.“

Þá bindur Rúnar vonir við það að farsæl lausn fáist í málinu en í stuttri yfirlýsingu frá handknattleiksdeild ÍBV á föstudaginn sagði að tvær hliðar væru á öllum málum og að Kára væri þakkað fyrir sitt framlag.

„Ég vona að hér verði mistök viðurkennd og ég vona að Kári fái afsökunarbeiðni á því hvernig samstarfinu lauk því hann á það skilið,“ skrifar Rúnar og bætir við:

„Ég vona svo auðvitað líka að sjá hann Kára með merki bandalagsins á brjóstinu og hann beri það stoltur, hvort sem það sé sem foreldri, þjálfari, stuðningsmaður eða leikmaður.

Ég hef einhvern veginn alltaf séð fyrir mér að mæta í stórt partý til Eyja þegar hann Kári myndi hætta að spila, þar yrði fyrri titlum og frábærum stundum hampað og treyja númer 46 dregin upp í rjáfur. Mér finnst Kári vera þannig leikmaður og mér finnst ÍBV vera þannig félag.“