Skoða að endur­heimta vot­lendi til að stöðva lofts­lags­breytingar og Rússa

Eistland er ríkt af mólendi en stór hluti þess hefur verið ræstur fram í þágu landbúnaðar. Þegar mómýrarnar þorna byrjar mórinn að rotna og gefa frá sér mikið magn kolefnis út í andrúmsloftið.

Erfiðlega hefur gengið fyrir eistnesk stjórnvöld að ráðast í endurheimt mómýranna vegna andstöðu margra heimamanna í sveitum landsins. Nokkrum endurheimtarverkefnum hefur þegar verið frestað af þessum sökum.

Nú segir blaðið Politico að loftslags- og varnarmálaráðuneyti Eistlands ræði nú um hvort að endurheimt mómýra gæti nýst til þess að verjast mögulegri innrás Rússa í framtíðinni. Mýrarnir geti bæði bundið kolefni og teppt för rússneskra skriðdreka.

Hugmyndin er enn sögð á frumstigi. Bæði finnsk og pólsk stjórnvöld hafa áður sagst skoða endurheimt votlendis við austurjaðar Atlantshafsbandalagsins sem bæði loftslags- og varnaraðgerð.

Eystrasaltsríkin þrjú hafa einnig rætt um að nýta núverandi votlendissvæði sem hluti af sameiginlegri varnarlínu sinni. Fram að þessu hefur þó ekki komið til tals að endurheimta votlendi gagngert í þeim tilgangi.