Viðskipti innlent

„Ó­hóf­legt gjald“ fyrir síma­notkun í Bret­landi heyri fljótt sögunni til

Elín Margrét Böðvarsdóttir skrifar
Þótt rauða símaklefa sé víða að finna um götur Lundúna notast langflestir við farsímann á ferðalögum.  
Þótt rauða símaklefa sé víða að finna um götur Lundúna notast langflestir við farsímann á ferðalögum.   EPA/TOLGA AKMEN

Íslenskir farsímanotendur munu frá og með 1. október greiða sömu gjöld fyrir farsímaþjónustu í Bretlandi og í öðrum ríkjum innan EES og ESB. Reglugerð þess efnis hefur verið birt í Stjórnartíðindum en henni er ætlað að tryggja að farsímanotendur, sem eru í viðskiptum við íslensk fyrirtæki á þeim markaði, greiði sömu gjöld í Bretlandi og víðast hvar annars staðar í Evrópu.

„Fjarskiptafyrirtæki skulu bjóða viðskiptavinum sínum heimaverðskrá (e. Roam Like Home) þegar þeir ferðast til Bretlands, enda sé notkunin í samræmi við eðlilegt notkunarmynstur ferðamanns. Þessi regla gildir ekki um viðvarandi reiki (e. Permanent Roaming),“ segir meðal annars í reglugerðinni. 

Líkt og Vísir greindi frá um miðjan ágúst hafa fjarskiptafyrirtækin Sýn, Síminn og Nova bætt Bretlandi aftur inn í svokallaða Reiki í Evrópu þjónustu en Bretland datt úr þjónustunni þegar Bretar gengu úr Evrópusambandinu.

Innviðaráðuneytið hafði þá boðað reglugerð til að koma í veg fyrir „óhóflegt gjald“ fyrir farnetsþjónustu yfir landamæri Bretlands og Norður-Írlands. Nú hefur reglugerðin litið dagsins ljós.

Fram kemur í tilkynningu frá innviðaráðuneytinu að reglugerðin sé í samræmi við áherslur ríkja innan EES og ESB um að ekki þurfi að greiða „óhóflegt gjald“ fyrir farnetsþjónustu við það eitt að ferðast yfir landamæri innan Evrópu, hvort sem um ræðir talsíma-, smáskilaboða- eða netþjónustu.

„Reglugerðin er sett á grundvelli fjarskiptalaga (70/2022) og tekur hún formlega gildi 1. október nk. Mörg fjarskiptafyrirtæki hófu þó þegar að breyta gjaldskrám sínum þegar áform um um reglugerðina voru kynnt fyrr í sumar,“ segir meðal annars í tilkynningunni.

Vísir er í eigu Sýnar.






Fleiri fréttir

Sjá meira


×