Úrvinnslusjóður svarar Sorpu

Tilkynning Úrvinnslusjóðs er í tilefni af því að Sorpa greindi frá því í dag að drykkjarfernur yrðu framvegis ekki flokkaðar sérstaklega frá pappír sem er sendur erlendis til endurvinnslu. 

Sorpa sagði ástæðuna þá að flokkunin skilaði afar litlum árangri og yki losun koltvísýrings. Sérflokkunin kostaði þar að auki um sjötíu milljónir króna á ári. Í ljósi þess að Úrvinnslusjóður hefði hafnað kröfu Sorpu um að greiða þann kostnað legðist hann ofan á sorphirðugjöld sem heimilin á höfuðborgarsvæðinu greiddu.

Í tilkynningu Úrvinnslusjóðs er áréttað að Sorpa hafi tilkynnt þann 7. júní 2023 um breyttar vinnsluaðferðir á drykkjarfernum og að það myndi fela í sér 75 milljóna króna kostnaðarauka. Sjóðurinn segir það alfarið á ábyrgð Sorpu.

„Í tilkynningu Sorpu frá í dag er látið að því liggja að í upphafi hafi verið áformað að Úrvinnslusjóður greiddi þennan kostnaðarauka, en að því hafi svo verið hafnað. Hið rétta er að engin beiðni barst Úrvinnslusjóði á þessum tímapunkti um að breyta gjaldskrá vegna pappa- og pappírsumbúða. Sorpa fór fyrst fram á umræddar greiðslur í febrúar 2024, og þá afturvirkt vegna ársins 2023. Stjórn Úrvinnslusjóðs tók erindið til umfjöllunar og hafnaði því, þar sem ekki lá fyrir greining á umhverfislegum ávinningi vinnslunnar. Í kjölfarið samdi Úrvinnslusjóður við Hagfræðistofnun HÍ um að gera kostnaðar- og ábatagreiningu á sérvinnslu drykkjarferna, með hliðsjón af umhverfislegum ávinningi. Niðurstaða þeirrar greiningar lá fyrir í september 2025 og svo virðist sem Sorpa hafi nú ákveðið á grundvelli hennar að falla frá sérvinnslu fernanna,“ segir í tilkynningunni.