Hljóp hálft mara­þon í Crocs og drakk úr skónum

Samkvæmt Mundo Deportivo hafði Yadgarov áður prófað að keppa í Crocs-skóm í tíu kílómetra hlaupi, í Barcelona í maí.

„Ég vildi bara sjá hvort að það að vera léttur á sér og með frjálsan huga myndi hafa meira að segja en tæknin,“ sagði Yadgarov eftir að hafa hlaupið tíu kílómetrana á aðeins 31 mínútu og 18 sekúndum, og þannig slegið mörgum við sem kepptu í sérhönnuðum hlaupaskóm.

Hann bætti svo um betur með því að klára hálft maraþon í Valencia á aðeins 1:09:03 en viðurkenndi að það hefði ekki verið neitt sérstaklega þægilegt.

„Aldrei aftur!!!“ skrifaði Yadgarov í færslu á Instagram þar sem hann sýndi frá hlaupinu sínu og hvernig iljarnar litu út eftir hlaupið.

Yadgarov virðist þó hafa verið fljótur að jafna sig og gæddi sér á ísköldu öli eftir hlaupið, og notaði annan skóinn og verðlaunapening sinn til þess að fá sér sopa.

Samkvæmt ferilskrá Yadgarov á heimasíðu alþjóða frjálsíþróttasambandsins hefur hann hraðast hlaupið hálft maraþon á 1:08:02 í Riva del Garda árið 2014. Hann hljóp heilt maraþon í Valencia fyrir tveimur árum á 2:14:07 og 10 kílómetra á 29:14 í Moskvu árið 2016. Það eru hins vegar afrek hans í Crocs-skónum sem vakið hafa mesta athygli.