Ætla í hart vegna á­kvörðunar Fjar­skipta­stofu

Í tilkynningu frá Sýn segir að mikilvægum áfanga hafi þó verið náð í ágreiningsmálinu við Símann í gær eftir að Fjarskiptastofa féllst í ákvörðun sinni á grundvallarsjónarmið félagsins um aðferðafræði við verðlagningu á sjónvarpsefni.

„Ákvörðun stofnunarinnar staðfestir jafnframt þá framtíðarsýn Sýnar að tækniþróun á sjónvarpsmarkaði sé óðfluga á leið frá lokuðum myndlyklakerfum yfir í opnar og aðgengilegar OTT-lausnir (smáforrit - App).

Þrátt fyrir þessa afmörkuðu jákvæðu þætti veldur endanleg efnisniðurstaða Fjarskiptastofu, sem skyldar Sýn til að veita Símanum aðgang að línulegu íþróttaefni sínu um lokað sjónvarpsdreifikerfi Símans, verulegum vonbrigðum. Sú niðurstaða gengur þvert á markmið um nýsköpun, virka samkeppni og neytendahagsmuni. Stjórn Sýnar hefur því falið lögmönnum félagsins að hefja undirbúning að málshöfðun fyrir dómstólum,“ segir í tilkynningunni.

Fjarskiptastofa hefur ekki birt ákvörðun sína.

Eftir ákvörðun Fjarskiptastofu frá í ágúst vísaði Sýn málinu til úrskurðanefndar fjarskipta- og póstmála sem komst að þeirri niðurstöðu um að stytta verulega gildistíma bráðabirgðaákvörðunar Fjarskiptastofu í málinu. Þar var fallist á kröfu Sýnar að hluta.

Óásættanleg niðurstaða og þrengir að eignaréttindum

Haft er eftir Herdísi Dröfn Fjeldsted, forstjóra Sýnar, að ákvörðun Fjarskiptastofu sé óásættanleg þar sem hún þrengi að atvinnufrelsi og eignaréttindum Sýnar.

„Þannig eru inngrip Fjarskiptastofu að koma í veg fyrir heilbrigða samkeppni og stuðla að markaðsráðandi keppinautur viðhaldi eða styrki stöðu sína. Af þeim sökum höfum við ákveðið að leita til dómstóla.

Við hvetjum viðskiptavini til að kynna sér þær leiðir sem Sýn býður upp á til að neyta sjónvarpsefnis og fjarskipta frá Sýn. Með því að nýta þessar leiðir eru neytendur að styðja við virka samkeppni og fjölbreyttara efnisframboð,“ er haft eftir Herdísi.

Hafna að verð skuli byggt á ímynduðu smásöluverði

Í tilkynningunni er tekið fram að Sýn sé ekki skylt að dreifa streymisveitunum SÝN+, Viaplay eða ólínulegu efni frá SÝN Sport á lokuðu kerfi Símans.

„Það er því mikilvægt að hafa í huga fyrir neytendur að pakkarnir sem Síminn býður eru langt frá því að vera sambærilegir. Hjá Símanum er eingöngu boðið upp á línulegu rásirnar SÝN, SÝN Sport og undirstöðvar.

Áfangasigur

Í ákvörðun sinni hafnaði Fjarskiptastofa alfarið kröfu Símans um að endurgjald fyrir flutningsrétt skyldi byggja á „ímynduðu smásöluverði“ og veittum afslætti af því. Þess í stað féllst stofnunin að öllu leyti á kröfu Sýnar um að beita bæri viðurkenndri aðferðafræði sem byggir á kostnaði við öflun efnis að viðbættri sanngjarnri álagningu. Fjarskiptastofa telur þá aðferð fela í sér „meira meðalhóf gagnvart Sýn“. Þetta tryggir að verðlagning byggir á raunverulegum og málefnalegum forsendum en ekki tilbúnum útreikningum keppinautar.

Nýsköpun og hagsmunir neytenda í húfi

Sýn bauð Símanum, líkt og öðrum samstarfsaðilum, aðgang að öllu sínu framúrskarandi sjónvarpsefni í gegnum app. Slík lausn er í fullu samræmi við markmið laga um að rjúfa tengsl efnis og dreifikerfa og stuðla að virkri samkeppni. Það er því miður ljóst að ákvörðun Fjarskiptastofu gengur gegn þessum markmiðum. Hún heftir nýsköpun og þjónar sérhagsmunum markaðsráðandi fyrirtækis á kostnað neytenda og framþróunar á íslenskum fjölmiðlamarkaði. Ákvörðunin grefur undan heilbrigðri samkeppni og hvata til þess að taka áhættu í kaupum á íslensku og erlendu íþróttaefni á viðskiptalegum forsendum,“ segir í tilkynningunni.

Síminn segir niðurstöðuna mikilvæga

María Björk Einarsdóttir, forstjóri Símans, segir í tilkynningu að endanleg niðurstaða Fjarskiptastofu sé mikilvæg, bæði fyrir Símann og neytendur á markaði.

„Ákvörðunin er afdráttarlaus og tryggir að ekki sé hægt að einoka sjónvarpsdreifingu á íþróttaefni á Íslandi. Áhorfendur í nútímasamfélagi vilja hafa val um hvar þeir nálgast sínar útsendingar og hér er það valfrelsi fest í sessi með skýrum hætti. Niðurstaðan staðfestir sömuleiðis að jafnt verði látið yfir alla ganga þegar kemur að reglum um flutningsrétt, en þegar Síminn hélt á sýningarrétti enska boltans var hann aðgengilegur á kerfum Sýnar,“ segir María Björk.

„Nú höldum við áfram að bjóða þessa góðu vöru Sýnar til sölu á okkar kerfum til viðbótar við metframboð vandaðs íslensks og alþjóðlegs efnis í Sjónvarpi Símans.“

Fréttin var uppfærð með tilkynningu Símans.

Vísir er í eigu Sýnar.