Kol­beinn enn ó­sigraður eftir að hafa rotað Martinez

Kolbeinn mætti Venezúelabúanum Pedro Martinez í hnefaleikahringnum í Finnlandi í gærkvöldi og skemmst er frá því að segja að Kolbeinn komst nokkuð klakklaust frá þeim bardaga.

Bardaganum lauk í annarri lotu þegar að Kolbeinn rotaði Martinez og tryggði sér þar með nítjanda sigurbardagann á atvinnumannaferlinum. Kolbeinn hefur enn ekki tapað bardaga. 

Líkt og fram kom í viðtali við Kolbein hér á Vísi í aðdraganda bardagans sagði hann frá því að það hefði reynst erfitt fyrir sig að fá bardaga en menn virtust tregir til þess að mæta honum í hringnum. Ætli góður árangur hans þar spili ekki mikið inn í. 

Um var að ræða annan bardaga Kolbeins á árinu en í þeim fyrsta tryggði hann sér WBF heimsmeistarabeltið með sigri gegn Mike Lehnis.

Ætla má að Kolbeinn muni vilja mæta aftur í hringinn sem fyrst eftir að hafa sloppið óskaddaður frá viðureign sinni gegn Martinez en hann hefur löngum verið að bíða eftir stóra tækifærinu á stóru bardagakvöldi. 

Kolbeinn er sem stendur 68. sæti á heimslista þungavigtarkappa en þar eru 1.568 þungavigtarkappar skráðir.