Erlent

Talið að Rob Reiner og eigin­kona hans hafi verið myrt

Ingvi Þór Sæmundsson skrifar
Rob Reiner og eiginkona hans, Michele, á frumsýningu kvikmyndarinnar The Magic of Belle Isle.
Rob Reiner og eiginkona hans, Michele, á frumsýningu kvikmyndarinnar The Magic of Belle Isle. getty/David Livingston

Leikstjórinn Rob Reiner fannst látinn í gær á heimili sínu í Los Angeles, ásamt eiginkonu sinni. Talið er að þau hafi verið myrt.

Slökkviliðsmenn fundu Reiner og eiginkonu hans, Michele, á heimili þeirra í Brentwood í Los Angeles. Þau voru úrskurðuð látin á staðnum. Reiner var 78 ára en Michele 68 ára.

Málið er rannsakað sem morð en áverkar fundust á líkunum sem benda til þess að hnífi hafi verið beitt. People hefur eftir heimildarmönnum að Nick Reiner, sonur hjónanna, sé grunaður um að hafa myrt foreldra sína.

Reiner átti langan feril sem leikstjóri en meðal þekktra mynda sem liggja eftir hann má nefna This Is Spinal Tap, The Princess Bride, When Harry Met Sally, Misery og A Few Good Men. Áður leikstjóraferilinn hófst gat Reiner sér gott orð sem leikari í sjónvarpsþáttunum All in the Family. Reiner var einnig einn stofnenda Castle Rock Entertainment, sem framleiddi meðal annars The Shawshank Redeption og Seinfeld.

Reiner-hjónin kynntust við tökur á When Harry Met Sally og gengu í hnapphelduna 1989. Þau áttu þrjú börn saman. Reiner var áður giftur leikstjóranum Penny Marshall.




Fleiri fréttir

Sjá meira


×