Opin­ber út­boð á árinu fyrir 221 milljarð króna

Þetta kemur fram í greiningu SI, sem kynnt var á Útboðsþinginu, sem fer fram í dag á milli klukkan 13 og 16 í Háteig á Grand Hótel Reykjavík, þar sem fulltrúar opinberra aðila kynna fyrirhugaðar verklegar framkvæmdir á árinu.

Útboð Landsvirkjunar umfangsmest

Í greiningunni segir að aukning milli ára skýrist nær alfarið af auknum fyrirhuguðum útboðum Landsvirkjunar, Framkvæmdasýslunnar – Ríkiseigna og Nýs Landspítala.

Umfangsmest séu fyrirhuguð útboð Landsvirkjunar, sem séu áætluð sjötíu milljarðar króna á árinu, sem nemi tæplega þriðjungi af öllum fyrirhuguðum útboðum þeirra sem taka þátt í Útboðsþingi SI í ár. 

„Aðrir sem boða umfangsmikil útboð árinu eru NLSH með 41 milljarð króna og FSRE með 35,7 milljarða króna. Samanlagt eru þessir þrír opinberu aðilar með boðuð verkútboð fyrir 146,7 milljarða króna árið 2026 eða um 66 prósent af fyrirhuguðum útboðum ársins. Aðrir þátttakendur þingsins fyrirhuga að bjóða út verk á árinu fyrir minna en 15 milljarða króna hver.“

119 milljarða áform runnu út í sandinn

Þó segir að á Útboðsþingi 2025 hafi verið kynnt áform tíu opinberra aðila um fyrirhuguð útboð fyrir 264,2 milljarða króna á því ári, en að árinu loknu hefðu aðeins útboð fyrir 145 milljarða króna raungerst. Útboð síðasta árs hafi því verið um 119 milljörðum minni en boðað var. 

Mestur munur hafi verið á fyrirhuguðum útboðum og raunútboðum hjá Landsvirkjun eða 68 milljarðar króna. Sá munur skýri um 57 prósent af fjárhæð þeirra fyrirhuguðu útboða sem ekki raungerðust á árinu. 

„Rétt er að árétta að þær áætlanir um útboð sem kynntar eru á Útboðsþingi SI eru ekki fastar í hendi og ber því að taka þeim með fyrirvara. Þá er einnig rétt að taka fram að verkefni sem fara í útboð á árinu geta komið til framkvæmda á næstu árum.“

Opinber fjárfesting fjórðungur veltu

Þá segir að áætlað sé að opinberir aðilar fjárfesti fyrir 226,2 milljarða króna á þessu ári, sem sé umtalsvert meira en á síðasta ári eða um 59 milljörðum meira. Líkt og með fyrirhuguð útboð þurfi að hafa í huga að ekki verður úr öllum fjárfestingum sem fyrirhugaðar eru á árinu. 

Þannig hafi sömu aðilar, samkvæmt Útboðsþingi 2025, áætlað að fjárfesta fyrir um 180,3 milljarða króna, en ný gögn sýni að fjárfesting þess árs hafi í raun numið 167,4 milljörðum króna, sem sé um sjö prósentum undir áætlunum.

„Fjárfestingar þeirra opinberu aðila sem þátt taka í útboðsþingi eru umfangsmikill hluti af starfsemi byggingariðnaðar og mannvirkjagerðar. Heildarveltan í greininni er áætluð 679 milljarðar króna á síðasta ári og því voru þessar framkvæmdir 25 prósent veltunnar. Samdráttur hefur mælst í heildarveltu greinarinnar undanfarið og því er sá vöxtur sem nú sést bæði í fjárfestingum og útboðum að skapa kærkomið mótvægi við samdrátt sem greina má í öðrum þáttum starfsemi greinarinnar og þá sérstaklega íbúðabyggingum. Einnig er þessi aukning jákvæð í ljósi þess að innviðaskuldin er mikil og því mikil þörf fyrir aukna fjárfestingu á þessu sviði.“

Greiningu SI má lesa í heild sinni í tengdum skjölum hér að neðan.