Skilur að fólk hafi á­hyggjur af falli Bitcoin en er sjálfur ró­legur

Þann sjöunda október á síðasta ári var virði einnar Bitcoin-myntar fimmtán milljónir króna. Á föstudag var virðið það lægsta síðan í september 2024 þegar ein mynt fékkst á sjö og hálfa milljón. Virðið féll því um fimmtíu prósent á fjórum mánuðum.

Breytist oft hratt

Virði myntarinnar hefur í gegnum tíðina verið mjög breytilegt og hreyfst hratt við vendingar í alþjóðamálum, til að mynda hækkaði það gríðarlega þegar Bandaríkjastjórn tilkynnti að hún hefði fjárfest í myntinni og svo lækkaði það þegar Bandaríkjaforseti tilkynnti að hann ætlaði að leggja tolla á fjölda ríkja heims.

Kristján Ingi Mikaelsson, sjóðsstjóri hjá Visku sjóðum og einn fremsti sérfræðingur landsins í rafmyntum, segir alltaf erfitt þegar eignir manns lækka í virði. Hann hefur þó enn fulla trú á myntinni.

„Þetta er langt frá því að vera það stærsta sem maður hefur séð í þessu. Ég hef verið að tala fyrir Bitcoin opinberlega síðan 2018 og mér hefur aldrei þótt heimurinn vera á betri stað fyrir Bitcoin til að láta ljós sitt skína. Heimurinn er búinn að vera á leiðinni í vonda átt þegar kemur að eignafrelsi, ritskoðun og alls konar málum til að varðveita sína fjármuni. Bitcoin er dreifð eign sem enginn getur tekið af þér og það er gríðarlega mikils virði í heimi eins og hann er í dag,“ segir Kristján Ingi. 

Íslendingar ekki mikið í Bitcoin

Aðrir Norðurlandabúar fjárfesti meira í Bitcoin en Íslendingar.

„Það hefur sögulega ekkert verið mjög mikið og maður hefði haldið að þjóð sem lenti í gjaldeyrishöftum og miklu fjármálaáfalli myndi taka þessu betur. En fólk átti mjög erfitt með að kaupa þetta snemma á síðasta áratug,“ segir Kristján Ingi.