Loka flug­velli El Paso skyndi­lega og án út­skýringa

Í skipun FAA, sem finna má hér, segir að flugmenn sem fylgi ekki lokuninni og skipunum flugumferðarstjóra gætu verið handteknir eða jafnvel skotnir niður.

Um milljón manns búa í El Paso og er 23. stærsta borg Bandaríkjanna. Hún er á landamærum Bandaríkjanna og Mexíkó.

Forsvarsmenn flugvallarins sögðu í yfirlýsingu, sem vitnað er í í grein New York Times, að lokunin hefði átt lítinn aðdraganda. Þeir segjast vera að bíða eftir frekari upplýsingum frá yfirvöldum. Svipaða sögu er að segja af borgaryfirvöldum í El Paso og þingmönnum sem hafa verið spurðir út í lokunina.

Flugumferðarstjórn Bandaríkjanna hefur ekki svarað fyrirspurnum fjölmiðla um málið. Fjölmiðlar vestanhafs segja lokun flugumferðar um svo stóra borg hafi ekki átt sér stað í Bandaríkjunum frá árásunum á Tvíburaturnana í New York árið 2001.

Umrætt bannsvæði nær í tíu sjómílna radíus út frá flugvellinum. Það samsvarar 18,5 kílómetrum og nær einnig til bæjarins Santa Teresa í Nýju Mexíkó, samkvæmt frétt El Paso Times. Bannið nær einnig yfir herstöð í El Paso.

Flugmönnum er þó heimilt að fljúga yfir þetta svæði í mikilli hæð.