Dæmdir fyrir að taka við fé fyrir Teslur sem þeir af­hentu aldrei

Tveir viðskiptavinir Even, sem þeir Gísli Gíslason, lögfræðingur, og Emil Kári Ólafsson ráku saman, kærðu þá fyrir að taka við milljónum króna upp í innborganir á Tesla-bifreiðum árið 2015 sem þeir afhentu aldrei.

Gísli og Emil Kári voru báðir dæmdir í fjögurra mánaða skilorðsbundið fangelsi í Héraðsdómi Reykjavíkur í síðustu viku. Auk þess þarf Gísli að greiða öðrum viðskiptavininum tólf og hálfa milljón króna auk vaxta en hinum rúmar sex milljónir króna.

Níu ár liðu frá því að rannsókn málsins hófst þar til ákæra var gefin út. Héraðsdómur taldi óútskýrð hlé hafa verið á rannsókninni þótt hann féllist á að umfang hennar væri óumflýjanlega mikið vegna eðlis sakarefninsins.

Tók dómstóllinn tillit til þessa mikla dráttar við ákvörðun refsingar Gísla og Emils Kára, sérstaklega varðandi skilorð og tímalengd þess. Refsing þeirra er bundin skilorði til eins árs frá uppkvaðningu dómsins.

„Bölvuð skítalykt“ af öllu saman

Bílasalarnir tveir voru ákærðir fyrir fjárfrátt þar sem þeir hefðu tekið við peningum til innborgunar á kaupverð Tesla-bifreiða en nýtt fjármunina í þágu fyrirtækisins í staðinn fyrir að standa skil á þeim. Þeir neituðu báðir sök.

Báru þeir því við að þeir hefðu ekki getað efnt sinn hlut í viðskiptunum vegna slæmrar skuldastöðu fyrirtækisins. Ástæðan fyrir henni hefði verið dráttur á afhendingu bifreiða frá Tesla-framleiðandans.

Í dómnum kemur fram að bókhald félagsins hafi verið losaralegt. Ekki hafi verið tryggt að greiðslur væru rekjanlegar, fylgiskjölum hafi verið áfátt og innborgunum viðskiptavina ekki haldið sérgreindum frá rekstri félagsins. Ekki hafi verið sérstakur vörslureikningur fyrir innborganir viðskiptavina.

Fyrrverandi starfsmaður fyrirtækisins sem bar vitni í málinu lýsti því þannig að það hefði verið „bölvuð skítalykt af þessu öllu saman“ í rekstrinum. Fjármagn hafi ekki verið til staðar og menn hefðu selt bifreiðar sem þeir keyptu af öðrum.

Ekkert kom fram við meðferð málsins sem dómstóllinn taldi staðfesta að innborganir viðskiptavinanna tveggja hefðu verið sendar bílaframleiðandanum eins og kveðið var á um í kaupsamningum við viðskiptavinina. Þess í stað hefði féð farið í almennan rekstur félagsins og því blandað saman við almenn rekstrarfé.

Báðir ábyrgir

Bæði Gísli og Emil Kári voru taldir sameiginlega ábyrgir fyrir ráðstöfun fjármuna félagsins þrátt fyrir að Gísli hefði reynt að varpa sökinni á samstarfsmann sinn. Þeir hefðu báðir mátt vita að innborganir viðskiptavina blönduðust við vörslufé. Þeir hefðu þá strax litið á fjármunina sem eign félagsins og farið með þá sem slíka.

Þá hefði þeim báðum mátt vera ljóst að fjárhagur félagsins hefði ekki verið traustur þegar þeir tóku við innborgununum og að óvíst væri að það gæti staðið við sitt.

Taldi dómurinn sannað að þeir hefðu gerst sekir um fjárdrátt með því að tileinka sér féð í þágu fyrirtækisins með ólögmætum hætti í auðgunarskyni.