Mayweather hitar upp fyrir Pacquiao-bardagann gegn sparkboxara

Pacquiao og Mayweather mætast í Las Vegas 19. september næstkomandi. Þetta verður annar bardagi þeirra en þeir áttust einnig við fyrir ellefu árum. Þá hafði Mayweather betur.

Til að tryggja að hann verði ekki ryðgaður þegar hann stígur inn í hringinn fyrir bardagann gegn Pacquiao mun Mayweather hita upp gegn hinum Zambidis í júní. Það verður fyrsti alvöru bardagi Mayweathers í níu ár, eða síðan hann mætti, og vann, Conor McGregor 2017.

Enn lengra er síðan Zambidis keppti síðast í alvöru bardaga en það var í júní 2015. Hann er 45 ára og þrautreyndur. Zambidis hefur unnið 157 af 181 bardaga sínum, þar af 87 með rothöggi.

Bardagi Mayweathers og Zambidis fer fram í Aþenu í Grikklandi, heimalandi þess síðarnefnda.

Mayweather, sem er 49 ára, hefur unnið alla fimmtíu alvöru bardaga sína á ferlinum. Hann keppti síðast í sýningarbardaga gegn John Gotti III í ágúst 2024.