Viktor Gísli frá­bær og Barca endaði á toppnum

Börsungar voru nánast búnir að tryggja sér efsta sæti riðilsins fyrir kvöldið, með því að verða fyrstir til að vinna Magdeburg í næstsíðustu umferðinni.

Þeir þurftu aðeins eitt stig í kvöld en unnu stórsigur, 47-27, gegn Eurofarm Pelister frá Norður-Makedóníu.

Viktor var með mikið betri tölfræði en kollegi hans hjá Barca, Emil Nielsen, í kvöld því Viktor varði 12 af 24 skotum sem hann fékk á sig, eða 50%. Nielsen varði 6 af 21 skot og var með 28,57% markvörslu.

Elvar með en Ómar fékk frí

Íslendingarnir í Magdeburg máttu þola tap gegn PSG í Frakklandi, 34-26, en endar samt í 2. sæti B-riðils og fer með bArcelona beint í 8-liða úrslitin.

Góðu fréttirnar fyrir Íslendinga eru þær að Elvar Örn Jónsson er kominn á ferðina eftir meiðslin á EM og skoraði þrjú mörk í kvöld. Gísli Þorgeir Kristjánsson skoraði eitt en Ómar Ingi Magnússon, sem fékk leyfi frá komandi landsleikjum vegna þess að von er á erfingja, var ekki í leikmannahópi Magdeburg í kvöld.

Fyrr í kvöld gerði Pick Szeged, lið Janusar Daða Smárasonar, 30-30 jafntefli við Wisla Plock í Póllandi. Janus var ekki á meðal markaskorara en úrslit kvöldsins þýða að Pick Szeged endar í 6. sæti B-riðils og fer ásamt PSG, GOG og Wisla Plock í umspil um að komast í 8-liða úrslitin.