„Heimsmarkaðsverð eitt og sér stýrir ekki verði úti í búð”

Lovísa Arnardóttir skrifar 13. mars 2026 08:03

Helgi segir álagningu skipta jafn miklu máli og heimsmarkaðsverð þegar verðlagning á súkkulaði er ákveðin. Aðsend

Helgi Vilhjálmsson, forstjóri Góu, segir að þegar horft sé til verðs í verslunum megi sjá að fleiri þættir ráði verðlagningu en aðeins heimsmarkaðsverð á kakói verði á súkkulaði. Heimsmarkaðsverð á kakói hrundi í síðasta mánuði og Helgi segir fyrirtækið tilbúið að taka hluta af sveiflum á sig.

Framkvæmdastjórar Nóa Síríus og Freyju sögðust í viðtali við Vísi fyrr í mánuðinum ekki eiga von á því að súkkulaðið þeirra myndi lækka í verði fyrr en í sumar eða um jólin þó svo að heimsmarkaðsverð hafi hrunið.

Helgi segir heimsmarkaðsverðið ekki það eina sem stýrir verðlagi á súkkulaðivörum á Íslandi.

„Ef við skoðum eggin í Bónus kemur í ljós að páskaegg frá Góu eru um 25 til 30 prósent ódýrari en sambærileg egg frá Nóa. Þeir eru ekki með eitthvað allt annað heimsmarkaðsverð á kakói en við,” segir Helgi. Hann bendir á að allir íslenskir framleiðendur starfi að stórum hluta við sömu aðstæður hvað hráefni varðar.

„Framleiðendur á Íslandi eru almennt búnir að tryggja sér verð á kakói og súkkulaðimassa fram í tímann. Það þýðir að við erum allir í raun á sama báti þegar kemur að hráefnisverði,“ segir Helgi og að álagning framleiðenda hafi einnig mikil áhrif á endanlegt verð, á til dæmis páskaeggjum.

Taka hluta kostnaðarhækkana á sig

Hann segir Góu reyna að halda verði á sínum súkkulaðivörum, öðrum en páskaeggjum, eins hóflegu og mögulegt er.

„Svo allir hafi efni á að leyfa sér smá súkkulaði.”

Hann segir fyrirtækið tilbúið að taka hluta af sveiflunum á sig

„Þó að við séum föst með verð á hráefni sem samið var um þegar heimsmarkaðsverð var mjög hátt höfum við lagt áherslu á að halda verði niðri eins og hægt er, jafnvel þótt það þýði að við tökum á okkur hluta af kostnaðarhækkunum.”

Páskar Verðlag Matvælaframleiðsla Sælgæti Neytendur