„Ekki fal­legur sigur og áttum hann eigin­lega ekki skilið“

„Heldur betur. Þetta var ekki fallegur sigur og við áttum hann eiginlega ekki skilið. HK-ingar voru frábærir í dag og gerðu allt sem HK stendur fyrir. Það var mikið hjarta í þessu hjá þeim og þeir komu okkur eiginlega bara á óvart með gæðunum í leiknum. Þeir héldu í við okkur og voru frábærir. Því þá fallegra að klára þetta,“ sagði Björgvin í leikslok.

„“Hann segir orkustigið í HK ekki hafa komið Valsmönnum á óvart.

„Nei, ekki endilega. Þeir voru bara að gera þetta svo klókt. Þeir spiluðu mjög vel sóknarlega og voru að koma okkur í vandræði. Svo héldu þeir líka vel út varnarlega og mættu okkur í öllu. Þeir komu bara með orku í dag sem við reyndum að mæta, en við vorum aðeins of lengi að koma okkur í úrslitakeppnisgírinn. Það kom aðeins í seinni hálfleik og þá fór þetta aðeins að ganga hjá okkur.“

„Við vorum í brasi eiginlega allan tímann. En að vera í brasi í 55 mínútur og vinna leikinn sýnir styrkleika.“

Þá segir hann að liðið hafi sýnt mikinn karakter að hafa náð að snúa dæminu við eftir að hafa lent fimm mörkum undir í seinni hálfleik.

„Klárlega. Það hefði verið auðvelt að panikka og láta stressið taka yfir. En þetta sýnir bara stærðina í þessu. Við erum helvíti góðir í handbolta og við vitum líka að við erum með góða breidd og marga góða leikmenn. Þegar leikurinn er 60 eða 70 mínútur þá yfirleitt endum við uppi sem sigurvegarar ef við höldum rétt á spilunum.“

Að lokum bendir Björgvin á nokkra hluti sem Valsliðið þarf að laga fyrir næsta leik gegn HK á sunnudaginn til að klára einvígið.

„Mér fannst við ekkert hræðilegir í þessum leik. Við vorum kannski ekki að slútta nógu vel og með aðeins of marga tæknifeila. Svo var ég lélegur fyrstu 40 mínúturnar og þá er þetta erfitt. Þannig að ég þarf að laga minn leik og hinir að líta í eigin barm, en við erum á fínum stað með þetta,“ sagði Björgvin að lokum.