„Ís­lenska eld­fjallið“ sem átti að vera vara­skeifa en vann svo titilinn

Sigurjón, sem verður 29 ára í næsta mánuði, fluttist fullur af ævintýraþrá til Noregs ásamt konu sinni, Elnu Ólöfu Guðjónsdóttur, sumarið 2024. Hann hafði þá varið mark HK en parið vildi prófa eitthvað nýtt.

Sigurjón fékk samning hjá Kolstad, norska ofurliðinu sem reyndar hefur svo dregið saman seglin síðustu misserin vegna mikilla fjárhagsvandræða, en var aðeins hugsaður sem þriðji markvörður liðsins, til taks ef á þyrfti að halda. Hann var hins vegar aðalmarkvörður Charlottenlund, venslaliðs Kolstad, í næstefstu deild.

Eftir eitt tímabil þar sem Sigurjón spilaði 22 leiki í næstefstu deildinni, og hljóp stöku sinnum í skarðið hjá Kolstad, jafnvel í Meistaradeild Evrópu, var staðan enn þannig síðasta haust að hann var hugsaður sem þriðji markmaður stórliðsins, á eftir sænska landsliðsmarkverðinum Andreas Palicka og Dananum Nicolai Neupart.

Fyrrnefnd fjárhagsvandræði leiddu hins vegar á endanum til sölu á Palicka á miðju tímabili og meiðsli Neupart gerðu jafnframt að verkum að allt í einu var Sigurjón orðinn aðalmarkvörður.

Óhætt er að segja að Sigurjón, sem er sonur landsliðsgoðsagnarinnar Guðmundar Hrafnkelssonar, hafi gripið gæsina og í úrslitaeinvíginu gegn Drammen var hann öryggið uppmálað.

Sigurjón var með 34 prósent markvörslu þegar Kolstad vann 34-30 í fyrsta leik og hann var svo með 31 prósent markvörslu í gærkvöld þegar Kolstad tryggði sér titilinn með 39-24 risasigri og þar með sæti í Meistaradeild Evrópu á næstu leiktíð.

Í grein Norsk Topphåndball, hagsmunasamtaka norsku úrvalsdeildarfélaganna, er Sigurjóni lýst sem „íslensku eldfjalli“ sem verið hafi eins og veggur bakvið vörn Kolstad í gær. Um tíma, meðan Kolstad náði upp sínu mikla forskoti, hafi Sigurjón verið með 50 prósent markvörslu og átt sinn þátt í að staðan var orðin 18-11 í hálfleik.

Sigurjón var í hópi þriggja Íslendinga sem spiluðu og áttu ríkan þátt í sigri Kolstad í úrslitakeppninni, eftir silfur í deildarkeppninni og bikarkeppninni fyrr á leiktíðinni. 

Benedikt Gunnar Óskarsson lét mikið til sín taka í gærkvöld og skoraði fjögur mörk og átti heilar sjö stoðsendingar, eftir að hafa verið markahæstur með níu mörk í fyrri sigrinum á Drammen. Fyrirliðinn Sigvaldi Björn Guðjónsson skoraði fjögur mörk í fyrri sigrinum en missti af leiknum í gærkvöld vegna meiðsla. Hann heldur nú til Þýskalands eftir að hafa samið við Hannover-Burgdorf. 

Arnór Snær Óskarsson, bróðir Benedikts, var einnig í liði Kolstad í upphafi leiktíðar en sneri svo heim til Vals og varð Íslandsmeistari í vor. Þangað hefur Sigurjón reyndar einnig verið orðaður og gæti því misst af Meistaradeildarkvöldunum með Kolstad næsta vetur.