Sara Björk tekur einnig að sér afreksþjálfun hjá Haukum

Söru Björk þarf vart að kynna en þar er á ferðinni ein allra besta knattspyrnukona sem Ísland hefur alið af sér og ljóst er hún verður mikill styrkur við lið Hauka í Lengjudeildinni.

Markmiðið er að Sara Björk spili sinn fyrsta leik fyrir Hauka gegn Keflavík þann 16. júlí. Þegar samningur hennar við Al-Qadsiah í Sádi-Arabíu er runninn út.

Ásamt því að spila með Haukum mun Sara Björk koma að afreksþjálfun innan knattspyrnudeildarinnar.

„Reynsla hennar á hæsta stigi knattspyrnunnar verður dýrmæt fyrir unga og efnilega leikmenn Hauka og mun án efa styrkja enn frekar afreksstarf félagsins,“ segir í tilkynningu Hauka.

Sara Björk kveðst afar ánægð að vera komin aftur heim á Ásvelli en nánar verður rætt við hana í Sportpakka Sýnar að loknum kvöldfréttum.