For­stjóri SPAR klippti á borðann í Hafnar­firði

Alþjóðaverslunarkeðjan SPAR International hefur nú formlega numið land en í febrúar undirrituðu Drangar, móðurfélag Samkaupa, samning við verslunarkeðjuna um notkun vörumerkisins hérlendis.

Markmið samningsins er að í lok árs 2027 muni verslanir undir merkjum 10–11, Krambúðar og Kjörbúðar bera alþjóðlegt vörumerki SPAR. Eftir innleiðinguna mun Samkaup selja matvöru undir vörumerkjunum Prís, Nettó og nú SPAR.

Önnur verslunin sem opnaði í dag er í Staðarbergi í Hafnarfirði en hin er við Barónsstíg í Reykjavík, þar sem áður var verslun Extra. Þessar verslanir bætast því í hóp þeirra 14 þúsund verslana sem hafa opnað í 50 löndum frá því að SPAR var stofnað í Hollandi 1932.

Forstjóri SPAR International, Tobias Wasmuht, og Auður Daníelsdóttir, forstjóri Dranga, opnuðu verslunina í Staðarbergi formlega í dag og klipptu þar á borða.

Síðar í júnímánuði verða opnaðar tvær SPAR verslanir í Kópavogi og í sumar verða síðan opnaðar verslanir við Laugalæk í Reykjavík, á Selfossi, í Búðardal og í Neskaupstað.

Viktor Freyr ljósmyndari fangaði nokkrur augnablik af opnunarathöfninni en þar greip hann einnig nokkrar myndir af nokkrum verðmerkingum í versluninni. 

Nýmjólkurfernan kostar 255 krónur í SPAR og er því 36 krónum dýrari þar en í Bónus, miðað við tölur frá verðlagseftirliti ASÍ. Fernan er jafnvel einni krónu dýrari en í Nettó, en bæði SPAR og Nettó eru rekin af Samkaupum.

Þá er hálfslítra flaska af Coca-Cola, sem kostar 229 krónur í SPAR, sömuleiðis 19 krónum dýrari í SPAR heldur en í Krónunni.

Þó nafnið SPAR kann væntanlega að vekja hugrenningartengsl við sögnina „að spara“ eru orðin alls óskyld. Verslunarkeðjan hét áður DESPAR sem var skammstöfun fyrir hollenska orðatiltækið „Door Eendrachtig Samenwerken Profiteren Allen Regelmatig“ (ísl. Allir hagnast reglulega á einhuga samvinnu). Nafnið hefur svo verið stílfært sem DE SPAR og svo einfaldlega SPAR.